ნეტგაზეთი | „ათწლიან პერსპექტივაში პოზიტიური“ – NAEC-ი PISA-ს გაუარესებულ შედეგზე „ათწლიან პერსპექტივაში პოზიტიური“ – NAEC-ი PISA-ს გაუარესებულ შედეგზე – Netgazeti
RU | GE  

„ათწლიან პერსპექტივაში პოზიტიური“ – NAEC-ი PISA-ს გაუარესებულ შედეგზე

შეფასებისა და გამოცდების ეროვნული ცენტრი (Naec-ი) აცხადებს, რომ მოსწავლეთა შეფასების საერთაშორისო პროგრამის (PISA-ს) კვლევით „ათწლიან პერსპექტივაში საქართველოს აქვს პოზიტიური ტენდენცია“. მაშინ, როდესაც წინა, 2015 წლის მაჩვენებელთან შედარებით შედეგები გაუარესებულია, Naec შედეგებს 10 წლის წინანდელ ვითარებას ადარებს.

მოსწავლეთა შეფასების საერთაშორისო პროგრამის (PISA-ს) უახლესი კვლევით, კითხვაში, მათემატიკასა და საბუნებისმეტყველო მეცნიერებებში 15 წლის ქართველ მოსწავლეებს კვლევაში მონაწილე ქვეყნების საშუალო მაჩვენებელზე დაბალი შედეგი აქვთ. გარდა ამისა, საქართველომ წინა კვლევასთან შედარებით (2015 წელი) სამივე კატეგორიაში გაუარესებულ შედეგები აჩვენა.

PISA-ს კვლევა ავტორიტეტული კვლევაა, რომელსაც ეკონომიკური განვითარებისა და თანამშრომლობის ორგანიზაცია (OECD) ატარებს სამ წელიწადში ერთხელ. ის აფასებს მოზარდების უნარებს კითხვაში, მათემატიკასა და საბუნებისმეტყველო მეცნიერებებში. სამინისტროს თანახად, PISA 2018 ციკლის კვლევაში მონაწილეობა საქართველოდან მიიღო 5572-მა მოსწავლემ 326 სკოლიდან.

3 დეკემბერს გამოქვეყნებული კვლევა, რომელიც 2018 წელს ჩატარდა, ჯამში, 70-ზე მეტ ქვეყანას მიმოიხილავს. ამ კვლევაში 15 წლის მოსწავლეები ცალ-ცალკე არიან შეფასებული კითხვის, მათემატიკისა და საბუნებისმეტყველო მეცნიერებების კატეგორიებში. საქართველო სამივე კატეგორიაში დაბალ საფეხურებზეა. კერძოდ:

  • კითხვაში საქართველო იკავებს 70/77-ე ადგილს და უწერია 380 ქულა, როცა OECD-ის ქვეყნების საშუალო ქულა არის 487
  • მათემატიკაში საქართველო იკავებს 66/78-ე ადგილს და უწერია 398 ქულა, როცა OECD-ის ქვეყნების საშუალო ქულა არის 489;
  • საბუნებისმეტყველო მეცნიერებებში საქართველო იკავებს 73/78-ე ადგილს და უწერია 383 ქულა, როცა OECD-ის ქვეყნების საშუალო ქულა არის 489;

წინა, 2015 წლის მაჩვენებლები ასეთი იყო:

  • კითხვაში საქართველოს ჰქონდა 401 ქულა, როცა OECD-ის ქვეყნების საშუალო ქულა იყო 493
  • მათემატიკაში საქართველოს ჰქონდა 404 ქულა, როცა OECD-ის ქვეყნების საშუალო ქულა იყო 490;
  • საბუნებისმეტყველო მეცნიერებებში საქართველოს ჰქონდა 411 ქულა, როცა OECD-ის ქვეყნების საშუალო ქულა იყო 493;

2015 წლის კვლევის შედეგებით, ეს მაჩვენებელი წინა კვლევასთან შედარებით გაზრდილი იყო (თუმცა საქართველოს მონაცემები 2015 წლამდე მხოლოდ 2009 წლიდან იყო, რადგან 2012 წელს საქართველოს, განათლების მაშინდელი მინისტრი დიმიტრი შაშკინის გადაწყვეტილებით, PISA-ს კვლევაში მონაწილეობა არ მიუღია).


ამ შედეგების ფონზე, შეფასებისა და გამოცდების ეროვნული ცენტრის (Naec-ის) ხელმძღვანელი, სოფიო გორგოძე ამბობს, რომ „PISA 2018-ის შედეგები გვაჩვენებს, რომ ათწლიან პერსპექტივაში საქართველოს აქვს პოზიტიური ტენდენცია – მათემატიკაში 19-ქულიანი, ხოლო საბუნებისმეტყველო საგნებში 10-ქულიანი გაუმჯობესებაა“. აღსანიშნავია, რომ 2009 წლიდან 2015 წლამდე მიღწეული პროგრესის შემდეგ, 2015-დან 2018-მდე სამივე კატეგორიაში შედეგები გაუარესებულია.

წყარო: OECD/PISA/NAEC

გორგოძემ ასევე განაცხადა, რომ „პრობლემები გვაქვს წიგნიერების კომპონენტში, თუმცა გენდერული განსხვავებები კითხვაში გოგონებსა და ბიჭებს შორის წინა წლებთან შედარებით 60 ქულიდან 38 ქულამდე შემცირდა“.

ამასთან, მისი თქმით, „პოზიტიური ტენდენციები იკვეთება თანასწორობის კუთხითაც, რაც ნიშნავს იმას, რომ დაბალი სოციო-ეკონომიკური სტატუსის მქონე მოსწავლეთა უფრო მეტი ნაწილი ახერხებს უკეთესი შედეგების ჩვენებას, ვიდრე ეს იყო 10 წლის წინ“.


2015 წლის კვლევის შედეგებით, ეს მაჩვენებელი წინა კვლევასთან შედარებით გაზრდილი იყო (თუმცა საქართველოს მონაცემები 2015 წლამდე მხოლოდ 2009 წლიდან იყო, რადგან 2012 წელს საქართველოს, განათლების მაშინდელი მინისტრი დიმიტრი შაშკინის გადაწყვეტილებით, PISA-ს კვლევაში მონაწილეობა არ მიუღია).

წყარო: PISA/OECD

როგორც დიაგრამიდან ჩანს, სამივე კატეგორიაში საუკეთესო შედეგებს უჩვენებს ჩინეთი, რომელსაც ჯერ სინგაპური მოსდევს, შემდეგ კი- ჰონგ-კონგი და მაკაო (ისინი, როგორც ჩინეთის სპეციალური ადმინისტრაციული რაიონი და ჩინეთის ავტონომიური ერთეული, ცალკე არიან შეყვანილები სიაში).

მათ მოსდევთ ესტონეთი, კანადა, ფინეთი, ირლანდია, პოლონეთი, შვედეთი, ახალი ზელანდია, აშშ, გაერთიანებული სამეფო, იაპონია, ავსტრალია და ა.შ…

კვლევაში საქართველოზე დაბალ შედეგებს უჩვენებენ პანამა, ინდონეზია, კოსოვო, მაროკო, ლიბანი, დომინიკის რესპუბლიკა და ფილიპინები.

წყარო: PISA/OECD/NAEC

წყარო: PISA/OECD/NAEC

წყარო: PISA/OECD/NAEC


PISA საერთაშორისო კვლევაა, რომელიც ამოწმებს 15 წლის მოზარდების მზაობას, გაუმკლავდნენ ყოველდღიურ გამოწვევებს იმ ცოდნისა და უნარების გამოყენებით, რომლებიც სკოლაში მიიღეს. ეს ის ასაკია, როცა მოსწავლეები თითქმის ასრულებენ სავალდებულო განათლების კურსს.

PISA-ს მიზანს არ წარმოადგენს, შეამოწმოს, თუ რამდენად კარგად აითვისეს მოსწავლეებმა უშუალოდ სკოლის პროგრამა, არამედ მიმართულია განსაზღვროს, რამდენად კარგად არიან მოსწავლეები მომზადებული საზოგადოებრივ ცხოვრებაში აქტიური და სრულფასოვანი ჩართულობისათვის.

Naec.ge-ს თანახმად, საქართველოში ამ კვლევის ფარგლებში შეფასდა 5 572 მოსწავლე და 326 სკოლა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com