საერთაშორისო რესპუბლიკური ისნტიტუტის (IRI) მიერ 18 ნოემბერს გამოქვეყნებული კვლევის შედეგები აჩვენებს, რომ საქართველოს მოსახლეობის 71% მხარს უჭერს ნატოში შესვლას. როგორც ბოლო 11 წლის დინამიკა აჩვენებს, ეს მაჩვენებელი ძირითადად სტაბილურია.

ნატოში შესვლას ყველაზე მეტი ადამიანი 2018 წლის შემოდგომაზე, აგვისტოს ომის შემდეგ უჭერდა მხარს და ეს მაჩვენებელი 87% იყო. მას შემდეგ აღნიშნული მცირედით იცვლებოდა, თუმცა, ძირითადად, 70%-იანი ნიშნულის ფარგლებში მერყეობდა.

IRI-ის კვლევის მიხედვით, გამოკითხულთა 41% მიიჩნევს, რომ მთავარი შემაფერხებელი, რაც ნატოში შესვლას ხელს უშლის, ოკუპირებული ტერიტორიებია, 23%-ის აზრით კი – რუსეთის წინააღმდეგობა.

გარდა ამისა, მოსახლეობის აღქმით, ნატოში შესვლა გააძლიერებს საქართველოს უსაფრთხოებას (27%), თავდაცვას (15%), გააძლიერებს ეკონომიკას (11%), ქვეყანას დაეხმარება დაკარგული ტერიტორიების დაბრუნებაში (9%), ხელს შეუწყობს მშვიდობას/სტაბილურობას (5%), ქვეყანას დაიცავს რუსეთისგან (4%) და ა.შ. კვლევის ერთ-ერთი მნიშვნელოვანი მიგნებაა ისიც, რომ 17%-მა საერთოდ არ იცის, რაში წაადგება საქართველოს ნატოში შესვლა.