სახელმწიფო დაცვის სპეციალური სამსახური ამბობს, რომ ექსპრეზიდენტ გიორგი მარგველაშვილის დაცვის საკითხზე ჯერ გადაწყვეტილება მიღებული არ არის.
კანონმდებლობის მიხედვით, უფლებამოსილების ვადის გასვლიდან 1 წლის შემდეგ მაღალი თანამდებობის პირები, მათ შორის ყოფილი პრეზიდენტი, „სახელმწიფო დაცვის სპეციალური სამსახურის“ დასაცავ პირთა სიაში აღარ ირიცხებიან და, შესაბამისად, მათ დაცვა ეხსნებათ. დაცვა ყოფილი თანამდებობის პირს არ მოეხსნება იმ შემთხვევაში, თუ სახელმწიფო ჩათვლის, რომ მის სიცოცხლესა და ჯანმრთელობას საფრთხე ემუქრება.
გიორგი მარგველაშვილის შემთხვევაში ზემოხსენებული 1-წლიანი ვადა მიმდინარე წლის დეკემბერში გადის.
“ეს არის ინსტიტუტებზე შურისძიება. აქ არ არის გიორგი მარგველაშვილზე საუბარი, აქ არის ლაპარაკი იმაზე, რომ პრეზიდენტი არავინ არ არის, არც ყოფილი პრეზიდენტი არავინ არ არის, ზოგადად, პრეზიდენტის ინსტიტუტი არაფერი არ არის. არც პრემიერ-მინისტრი ამ ქვეყანაში არავინ არ არის. ამისი იდეოლოგიზაცია ხდება. მე მგონი, ამ პოლიტიკური საუბრებების განმავლობაში ვეთანხმები ბატონ ყოფილ თავმჯდომარეს [ირაკლი კობახიძე], რომ მე ნამდვილად არაფერი მემუქრება და არ მგონია, რომ ასეთივე პოზიტივი ჰქონდეს მას. მე არაფერი მემუქრება, რადგან პოზიტივს ვხედავ საზოგადოების მხრიდან”, – აცხადებს მთავარ არხთან ინტერვიუში გიორგი მარგველაშვილი
ნეტგაზეთმა წერილობით მიმართა სახელმწიფო დაცვის სპეციალურ სამსახურს, რის საფუძველზე დაადგინეს, რომ მარგველაშვილი დაცვას არ საჭიროებს. უწყებიდან წერილობით მოგვწერეს, რომ ჯერჯერობით გადაწყვეტილება მიღებული არ არის.
“თქვენს მომართვაში გათვალისწინებულ საკითხზე მსგავსი გადაწყვეტილება მიღებული არ არის. რაც შეეხება საქართველოს პრეზიდენტის უფლებამოსილების ვადის ამოწურვიდან ერთი წლის გასვლის შემდეგ, საკითხის განხილვა და გადაწყვეტილების მიღება მოხდება “სახელმწიფო დაცვის სპეციალური სამსახურის შესახებ” საქართველოს კანონით დადგენილი გარემოებების გათვალისწინებით”, – ნათქვამია უწყების წერილში.
