ახალი ამბები

ქართული ოცნება აჭარის უმაღლეს საბჭოში განვითარებულ მოვლენებს გამოეხმაურა

14 მარტი, 2015 • • 1049
ქართული ოცნება აჭარის უმაღლეს საბჭოში განვითარებულ მოვლენებს გამოეხმაურა

“აჭარის ავტონომიური რესპუბლიკის უმაღლეს საბჭოში გუშინ განვითარებულმა მოვლენებმა კიდევ ერთხელ შეგვახსენა, რომ კონსტიტუციისა და კანონის უპატივცემულობა, დილეტანტობა და ავანტიურისტობა არის ის თვისებები, რომლებიც “ნაციონალური მოძრაობის” სახეს განსაზღვრავს. მაშინ, როდესაც აჭარის კონსტიტუცია ერთმნიშვნელოვნად აცხადებს, რომ ავტონომიური რესპუბლიკის უმაღლესი საბჭოს თავმჯდომარის მოადგილე სიითი შემადგემლობის უმრავლესობით, ანუ 11 ხმით აირჩევა, “ნაციონალური მოძრაობის” წევრებმა, კონსტიტუციისა და უმაღლესი საბჭოს რეგლამენტის უხეში დარღვევით, 8 ხმით აღნიშნულ თანამდებობაზე არჩეულად გამოაცხადეს თავიანთი თანაგუნდელი, ჯემალ ფუტკარაძე.

ამასთან, აღნიშნული აქტით, ჯემალ ფუტკარაძემ, მედეა ვასაძემ და მურმან დუმბაძემ კიდევ ერთხელ განახორციელეს თვითლუსტრაცია და დაადასტურეს, რომ ისინი მთელი შეგნებით იზიარებენ იმ ღირებულებებს, რომელსაც ქართულ პოლიტიკაში “ნაციონალური მოძრაობა” განასახიერებს.

“ქართული ოცნება – დემოკრატიული საქართველო” გამოხატავს გულისტკივილს იმის გამო, რომ დუმბაძე, ფუტკარაძე და ვასაძე წავიდნენ მძიმე კომპრომისზე საკუთარი ღირსებისა და სინდისის წინაშე და შეერწყნენ “ნაციონალურ მოძრაობას”, – აცხადებენ პარტიაში.
ამასთან, “ქართული ოცნება – დემოკრატიული საქართველოს” მტკიცებით, არავის და, მით უმეტეს, “ნაციონალურ მოძრაობას” არ მისცემენ საშუალებას, იმოქმედონ კანონის წინააღმდეგ.

 

“ჩვენ უზრუნველვყოფთ აჭარის ავტონომიური რესპუბლიკის უმაღლეს საბჭოში პროცესების განვითარებას კონსტიტუციისა და კანონმდებლობის შესაბამისად”, – ნათქვამია პარტიის განცახდებაში. 

მასალების გადაბეჭდვის წესი