თბილისში, რუსთაველის გამზირზე უკვე მე-13 დღეა მიმდინარეობს საპორტესტო აქცია ერთადერთი მოთხოვნით – გადადგეს შინაგან საქმეთა მინისტრი გიორგი გახარია.

“შეგვისრულეთ მესამე მოთხოვნა და შეწყდება თქვენი რეიტინგის თავდაღმართში სიარული”, – ასე მიმართა სცენიდან ერთ-ერთმა ორგანიზატორმა შოთა დიღმელაშვილმა ხელისუფლებას სცენიდან.

მისივე თქმით, გახარია არის “ქართული ოცნების” პოლიტიკური ტვირთი და “მას არ აქვს ლეგიტიმაცია, რადგან 17 წლის გოგოებს თვალები დათხარა”.

როგორც დიღმელაშვილი ამბობს, დროთა განმავლობაში შეიცვლება აქციის ფორმატი, თუმცა იქნება პერმამენტული – აქციები არ შეწყდება და გარკვეული პერიოდულობით გაიმართება “თავისუფლების მარშებიც”.

საქართველოს ხელისუფლებამ 20 ივნისს ძალის გამოყენებით დაარბია საპროტესტო აქცია, სადაც ხელისუფლების ზოგი მაღალჩინოსნის გადადგომას მოითხოვდნენ საქართველოში რუსეთის დელეგაციის ვიზიტთან დაკავშირებით. პოლიციამ დარბევისას გამოიყენა ცრემლსადენი გაზი და რეზინის ტყვიები, რომლებსაც, თვითმხილველების ცნობით, დამიზნებით ესროდნენ ადამიანებს. შედეგად, დაშავდა 240-ზე მეტი ადამიანი, მათ შორის, 80 პოლიციელი.