10 სექტემბერს, ცესკოს სხდომაზე მიღებული დადგენილების საფუძველზე, 2014 წლის 15 ივნისის არჩევნებისთვის რეგისტრირებულ ადგილობრივ და საერთაშორისო სადამკვირვებლო ორგანიზაციებს, ხარაგაულის მუნიციპალიტეტის საკრებულოს 30 ოქტომბრის შუალედურ არჩევნებში დაკვირვების უფლების მოპოვების მიზნით, საარჩევნო კომისიებში შეუძლიათ წარმოადგინონ მხოლოდ უფლებამოსილი პირის მიერ ხელმოწერილი განცხადება და დამკვირვებელთა სიები პირადობის მოწმობების ასლებთან ერთად.
აღნიშნული დოკუმენტაცია ადგილობრივმა სადამკვირვებლო ორგანიზაციებმა უნდა წარმოადგინონ არაუგვიანეს 25 ოქტომბრის 18:00 საათისა, ხოლო საერთაშორსიო ორგანიზაციებმა – არაუგვიანეს 28 ოქტომბრის 18:00 საათისა.
რაც შეეხება იმ ორგანიზაციებს, რომლებსაც არ ჰქონდათ გავლილი რეგისტრაცია 2014 წლის 15 ივნისის არჩევნებზე, ისინი აკრედიტაციას კანონით დადგენილი პროცედურების შესაბამისად გაივლიან, აცხადებს ცესკო.
ადგილობრივმა დამკვირვებელმა ორგანიზაციებმა რეგისტრაციაში გატარების მიზნით ადმინისტრაციას განცხადებით უნდა მიმართონ არჩევნებამდე არაუგვიანეს მეათე დღისა (20 ოქტომბერი – 18:00 საათი). საერთაშორისო დამკვირვებელ ორგანიზაციებს ანალოგიური პროცედურებისთვის ვადა არჩევნების დღემდე არაუგვიანეს მე-7 დღისა ( 23 ოქტომბერი – 18:00 საათი) აქვთ.
ცესკოს ცნობით, მედიის წარმომადგენლებმა განცხადება აკრედიტაციის შესახებ შესაბამის საარჩევნო კომისიას 27 ოქტომბრის 18:00 საათამდე უნდა მიმართონ. დეტალური ინფორმაცია რეგისტრაცია /აკრედიტაციის შესახებ იხილეთ შემდეგ ბმულებზე: