“არ ვარ ობიექტური” – იყო თუ არა პირნათელი მურუსიძე მოლაშვილის საქმეში ნაცვლიშვილის აზრით

“TV პირველის” გადაცემა “პოლიტმეტრში” ლაშა ნაცვლიშვილმა, რომელიც “ქართული ოცნების” პიარკონსულტანტია, პირდაპირ არ უპასუხა ჟურნალისტ ნინო ჟიჟილაშივლის კითხვას, იყო თუ არა ლევან მურუსიძე ნაცვლიშვილის მეგობრის, სულხან მოლაშვილის საქმეში პირნათელი.

ნაცვლიშვილის ინფორმაციით, სულხან მოლაშვილი მისი მეგობარი იყო.

ნაცვლიშვილმა აღნიშნა, რომ შალვა შავგულიძე, რომელიც მოლაშვილის უფლებებს იცავდა ამ საქმეში, მისი აზრით, პირნათელი იყო. რაც შეეხება ლევან მურუსიძის როლს, რომელიც საქმის ერთ-ერთი მოსამართლე იყო, ნაცვლიშვილის პოზიციები ასეთია:

ჟიჟილაშვილი: პირნათელია თუ არა მოლაშვილის საქმეში მურუსიძე? მე ამ კითხვაზე პასუხი ვერ მივიღე.

ნაცვლიშვილი: მე არავარ ობიექტური მოლაშვილის საკითხში…

ჟიჟილაშვილი: არ ამბობთ, რომ მურუსიძე ობიექტური არ არის.

ნაცვლიშვილი: ვიტყვი და მერე გამისწორეთ, მე არ ვარ ობიექტური…

ჟიჟილაშვილი: უვლით.

ნაცვლიშვილი: რა, არ ვუვლი, თუ დამამთავრებინებთ, გეტყვით.

ჟიჟილაშივლი: ლაშა, ძალიან მარტივია თქვათ, რომ მურუსიძე ან პირნათელია ამ სამქეში, ან არ არის.

ნაცვლიშვილი: არაფრის არ მეშინია, მურუსიძე არის ის ადამიანი, რომელიც თვლის რომ მან მიიღო მაშინ…

ჟიჟილაშვილი: თქვენ როგორ გგონიათ-მეთქი.

ნაცვლიშვილი: მე მგონია, რომ მთელი სამართალწარმოება მოლაშვილის მიმართ დაკავებიდან აღსასრულამდე, როდესაც ის დაავადდა და ახალგაზრდა ჯან-ღონით სავსე კაცი აღესრულა, ეს იყო პოლიტიკური დევნის მსხვერპლი.

ჟიჟილაშვილი: მურუსიძე პირნათელია თუ არა, როგორც მოსამართლე?

ნაცვლიშვილი: სტანდარტს გეტყვით.

ჟიჟილაშვილი: სხვა კითხვა დაგისვით.

ნაცვლიშვილი: არ მაცდით და არ გაინტერესებთ…

ჟიჟილაშვილი: მაინტერესებს, მოლაშვილთან მურუსიძე არის თუ არა პირნათელი.

ნაცვლიშვილი: გეტყვით, ორი სხვადასხვა სიბრტყიდან ვლაპრაკობთ.

ჟიჟილაშივლი: ლაშა, მარტივი კითხვაა…

ნაცვლიშვილი: არ არის მარტივი კითხვა, მარტივად გპასუხობთ, თუ დამაცდით. არსებობს უფლებადაცვითი მაღალი სტანდარტი, რომელიც ამბობს, რომ ის გარემოება, რომ კაცს ფორმალურად აქვს სისხლის სამართლის დანაშაული ჩადენილი, არ არის საკმარისი პირობა რომ ის არ ჩავთვალოთ პოლიტიკურად დევნილად. მაგალითად, ტიმოშენკო. მთელმა მსოფლიომ იცოდა, რომ გაფლანგა და მიიტაცა ის ფული, მაგრამ ვინაიდან მისი დევნა განხორციელდა არა კორუფციის გამო, არამედ იმიტომ, რომ ის იყო პოლიტიკური ოპონენტი, ის ჩაითვალა პოლიტიკურ დევნილად. ახლა მე გეუბნებით, მოლაშვილთან მურუსიძეს დამოკიდებულება აქვს ფორმალისტური, სისხლის სამართლის წაყენებული ბრალდების ფარგლებში და ის ამ რწმენაშია. მე ვამბობ, რომ მოლაშვილი იყო პოლიტიკური დევნის მსხვერპლი და მოტივირებული იყო პოლიტიკურად. ეს არის ჩვენ შორის სხვაობა, მეტი არაფერი.

ჟიჟილაშვილი: პასუხი კითხვაზე, იყო თუ არა მურუსიძე მოლაშვილის საქმეში პირნათელი როგორც მოსამართლე?

ნაცვლიშვილი: კიდევ ერთხელ ვამბობ, მე ვთვლი, რომ მოლაშვილი იყო პოლიტიკური დევნის მახვერპლი. შესაბამისად, მის მიმართ ყველა გადაწყვეტილება, ჩემი აზრით….

ჟიჟილაშვილი: თქვენ არ უპასუხეთ შეკითხვას. თქვენი მეგობრის, სულხან მოლაშვილის ერთ-ერთი მოსამართლე ლევან მურუსიძე იყო თუ არა პირნათელი ამ საქმეში. თქვენ ამ კითხვას არ უპასუხეთ.


მოლაშვილის საქმეზე საქართველომ სტრასბურგში კონვენციის არაერთი მუხლის, მათ შორის სამართლიანი სასამართლოს უფლების დარღვევა აღიარა და მხარეს 20 ათასი ევრო გადაუხადა. სრულად სტრასბურგის გადაწყვეტილებას მოლაშვილის საქმეზე შეგიძლიათ გაეცნოთ აქ.

სულხან მოლაშვილი 2016 წელს გარდაიცვალა.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.