ნეტგაზეთი | სომხეთის მედიის ცნობით, აზერბაიჯანელი დივერსანტი ყარაბაღში დაკრძალეს სომხეთის მედიის ცნობით, აზერბაიჯანელი დივერსანტი ყარაბაღში დაკრძალეს – Netgazeti
RU | GE  

სომხეთის მედიის ცნობით, აზერბაიჯანელი დივერსანტი ყარაბაღში დაკრძალეს

panorama.am-ს ინფორმაციით, მთიანი ყარაბაღისა და აზერბაიჯანის საზღვრებს შორის მონაკვეთზე, დივერსიულ-დაზვერვითი შეღწევის მცდელობის დროს დაღუპული აზერბაიჯანის მოქალაქე, მისი ვინაობის დაუდგენლობის გამო, მთიან-ყარაბაღში დაკრძალეს.  

გამოცემის ინფორმაციით, სომხეთში საერთაშორისო ორგანიზაცია “წითელი ჯვრის” წარმომადგენელმა, ზარა ამატუნმა განაცხადა, რომ ორგანიზაცია მზად არის დივერსანტის ცხედარი აზერბაიჯანში გადაასვენოს. 

 

რაც შეეხება ჯგუფის დაკავებულ 2 წევრს, წითელი ჯვრის წარმომადგენლის ცნობით, ისინი მოინახულეს ორგანიზაციის წარმომადგენლებმა და ოჯახების შესახებ ინფორმაცია გადასცეს. თუმცა, დამატებითი დეტალების გაცხადებისგან თავს იკავებენ.  

 

ივლისის დასაწყისში მთიანი ყარაბაღის თავდაცვის სამინიტროს მიერ გავრცელებული ინფორმაციის თანახმად, “მთიანი ყარაბაღისა და აზერბაიჯანის საზღვრებს შორის მონაკვეთზე, მოწინააღმდეგემ დივერსიულ-დაზვერვითი შეღწევის მორიგ მცდელობას მიმართა.” 

 

მაშინდელი ინფორმაციით, ყარაბაღის მხარემ რამდენიმე ადამიანი ტყვედ აიყვანა, ნაწილი კი, ოფიციალური ინფორმაციით, გაიქცა. 


 

აზერბაიჯანსა და სომხეთის შორის მთიანი ყარაბაღის კონფლიქტი 1988 წელს დაიწყო. აზერბაიჯანი მიიჩნევს, რომ მთიანი ყარაბაღი და შვიდი მიმდებარე რაიონი, აზერბაიჯანის 20%, სომხეთის შეიარაღებული ძალების ოკუპაციაშია, რასაც კატეგორიულად უარყოფს სომხეთი.

 

1994 წელს მხარეებმა  ხელი მოაწერეს ცეცხლის შეწყვეტის რეჟიმს, მაგრამ დღემდე წარუმატებელად მიიჩნევა საერთაშორისო ორგანიზაციების ეგიდით წარმოებული მოლაპარაკებები ამ ორ ქვეყანას შორის.

 

ორივე მხარე გამუდმებით ერთმანეთს ადანაშაულებს ცეცხლის შეწყვეტის შესახებ რეჟიმის დარღვევაში. 


მასალა მომზადებულია პროექტ “სამხრეთ კავკასიის ამბების” ფარგლებში ჰაინრიჰ ბიოლის ფონდის მხარდაჭერით. პროექტის ფარგლებში მომზადებული ტექსტები შეიცავს იმ ტერმინოლოგიას, რომელიც აფხაზეთის, სამხრეთ ოსეთის და მთიანი ყარაბაღის თვითაღიარებულ რესპუბლიკებში გამოიყენება. მასალებში გამოთქმული მოსაზრებები შესაძლოა არ ემთხვეოდეს ჰაინრიჰ ბიოლის ფონდის და ნეტგაზეთის პოზიციას. 
   
   



ნეტგაზეთის მასალების სხვა გამოცემებში გადაბეჭდვის წესი
ნეტგაზეთი