არ არსებობს დედამიწაზე ქალი, რომელიც დაყრის ფარ-ხმალს – წულუკიანი კადრების გავრცელებაზე

საქართველოს იუსტიციის მინისტრი თეა წულუკიანი იმედს გამოთქვამს, რომ პირადი ცხოვრების ამსახველი კადრების გავრცელების საქმეზე მართლმსაჯულება მალე განხორციელდება.

იუსტიციის მინისტრის განცხადებით, ის გმობს ყველანაირი ფარული ჩანაწერის გავრცელებას, მით უმეტეს, როდესაც მიზნად ისახავს ქალზე ტერორს:

„მე ვფიქრობ იმას, რასაც ვფიქრობდი ხუთი წლის წინ, ოთხი წლის წინ, სამი წლის წინ და რასაც ვიფიქრებ მუდამ. ვისზეც უნდა გავრცელდეს ფარული ჩანაწერი − იქნება ეს ჩვენივე გუნდის წევრი, პოლიტიკური ოპონენტი თუ სხვა. მე ვფიქრობ, რომ ეს არის მიუღებელი, ყველამ უნდა დაგმოს ეს ფაქტი და გაემიჯნოს მას.

მე პირადად ყველანაირი ფარული ჩანაწერის გავრცელებას, მით უმეტეს, როდესაც ეს ეხება და, სავარაუდოდ, მიზნად ისახავს ქალზე ტერორს, და როგორც ითქვა კიდეც, მორალური ტერორის მცდელობას, ამას, რა თქმა უნდა, ვგმობ. მინდა, აქვე დავძინო, რომ არ არსებობს დედამიწაზე ქალი, რომელიც დაყრის ფარ-ხმალს. ქალი არის ძლიერი და ვინც ამას ავრცელებს, მე მინდა, ეს რჩევა მივცე, რომ იფიქროს სხვა რამეზე, აკეთოს სხვა საქმე, ეს არის დანაშაული”, – ამბობს წულუკიანი.

მინისტრის თქმით, ყველამ უნდა იცოდეს, რომ არც ეკა ბესელია და არც სხვა ვინმე ქალი არ არის ის ნატურა, რომელიც შეშინდება, გაჩერდება და ფარ-ხმალს დაყრის:

“მე იმედი მაქვს, რომ ამ ადამიანებს მალე მიაკვლევს გამოძიება და მართლმსაჯულება განხორციელდება, მაგრამ სისხლის სამართლის პროცესი რომ გვერდზე გადავდოთ, მინდა, ყველამ იცოდეს, რომ არც ეკა ბესელია და არც სხვა ვინმე ქალი არის ის ნატურა, რომელიც შეშინდება, რომელიც გაჩერდება; ის, რომელიც დაყრის ფარ-ხმალს.

ამიტომაც ისინი, ვინც ამას ავრცელებს, კარგი იქნება, თუ სხვა საქმით დაკავდებიან, და როდესაც მათ მიაკვლევს გამოძიება, რა თქმა უნდა, პასუხს აგებენ კანონის წინაშე. ადრეც იყო ამგვარი ჟურნალისტზე, პოლიტიკოსებზეც იყო მცდელობა ტერორისა ამ გზით; მაშინაც ვთქვი და იმავეს ვფიქრობ დღეს − არცერთი ქალი არ შევშინდებით! გაავრცელეთ, რაც გნებავთ. აი, ეს არის ჩემი გზავნილი იმ ადამიანისთვის, ვინც ამ სიბინძურით არის დაკავებული“, – აცხადებს წულუკიანი.

ამავე თემზე:

შსს – პირადი ცხოვრების კადრების საქმეზე 16 პირია დაკავებული

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.