საქართველოს პრეზიდენტმა მილოცვის წერილი ამერიკის შეერთებული შტატების პრეზიდენტ ბარაკ ობამასა და აშშ-ის ვიცეპრეზიდენტ ჯო ბაიდენს გაუგზავნა.
წერილში გიორგი მარგველაშვილი ამერიკის მთავრობასა და მოქალაქეებს მადლობას უხდის საქართველოში დემოკრატიის განვითარების ხელშეწყობაში შეტანილი წვლილისა და საქართველოს მხარდაჭერისათვის. გიორგი მარგველაშვილმა ბარაკ ობამა საქართველოში მოიწვია:
“ბატონო პრეზიდენტო, მსურს მოგიწვიოთ საქართველოში ნებისმიერ თქვენთვის მოსახერხებელ დროს, რათა უფრო სიღრმისეულად განვიხილოთ ჩვენს ქვეყნებს შორის არსებული და სამომავლო თანამშრომლობის ასპექტები”, – აღნიშნულია პრეზიდენტის წერილში.
გიორგი მარგველაშვილი იმედოვნებს, რომ საერთო პრინციპებსა და ფასეულობებზე დაფუძნებული საქართველოსა და აშშ-ის თანამშრომლობა, რომელიც წარმატებით ვითარდება აშშ-საქართველოს სტრატეგიული პარტნიორობის შესახებ ქარტიის ფარგლებში ყველა მნიშვნელოვანი მიმართულებით, კიდევ უფრო განმტკიცდება და გაღრმავდება მომავალში.
ამერიკის შეერთებული შტატები 2014 წლის 4 ივლისს შეერთებული შტატების დამოუკიდებლობის დეკლარაციაზე ხელმოწერის 238-ე წლისთავს აღნიშნავს. 1776 წლის 4 ივლისს ფილადელფიაში ბრიტანეთის ცამეტმა კოლონიამ ხელი მოაწერა დამოუკიდებლობის დეკლარაციას, როთიც ახალი რესპუბლიკა – ამერიკის შეერთეული შტატები შეიქმნა.