ახალი ამბები

„დეპუტატის ძმამ დამჭრა“

2 ივლისი, 2014 • 1217
„დეპუტატის ძმამ დამჭრა“

 

ქედის საავადმყოფოში ადასტურებენ მამუკა მახარაძი მიყვანის ფაქტს, თუმცა ჭრილობის ხარისხზე განმარტებას არ აკეთებენ.

 

„ბათუმელებმა“ მოახერხა დაკავშირებდა მამუკა მახარაძეს, რომელიც ინციდენტის დეტალებს ყვება: „ხელს ვერ ვამოძრავებ მხარში. ჭრილობა ზურგზე მაქვს, 3 ნაკერია გაკეთებული. მეუბნებიან ჭრილობა 5-7 სანტიმეტრიაო, მაგრამ ეს დასკვნაში არ გადაცემულა. პოლიციაში არ გადაცემულა. რატომ არ ვიცი. არც ის ვიცი, ვინ გადაწყვიტა, რომ არ გადაეცათ. მე დღეს მივდივარ თბილისში, ექიმს უნდა ვეჩვენო, ხელს ავამოძრავებ თუ ვერა და დანარჩენს მერე შევხედავ, ჩემ საქმეში“.

 

მამუკა მახარაძე ამბობს, რომ თავდამსხმელს „ნახევარმეტრიანი ხანჯალი ეკავა ხელში, მოჩუქურთმებული“: – რა იყო მიზეზი? – ჩვენ შორის კონფლიქტი, რა თქმა უნდა, პოლიტიკურ ვარიანტს მოყვა, საწყისი მაგი იყო, მაგრამ ამ მომენტში ჩვენ ამ თემაზე არ ვლაპარაკობდით. მე ვლაპარაკობდი ჩემ პირად საქმეზე და ის ჩამერია და მოულოდნელად დამარტყა ხანჯალი. მაგიდასთან ვიჯექი და ლუდს ვსვამდი“.

 

„ბათუმელებმა“ ბაქარ ბარამიძესთან დაკავშირება ვერ მოახერხა. ტელეფონი, რომელიც ირაკლი ბარამიძემ მოგვაწოდა, როგორც თავისი ძმის ნომერი, გამორთულია. თავად ირაკლი ბარამიძე ამბობს, რომ ძმასთან დაკავშირებული ინციდენტის შესახებ არაფერი სმენია.

 

შს სამინისტროს ინფორმაციით, გამოძიება დაიწყო სისხლის სამართლის კოდექსის 118-ე მუხლით, რაც სხეულის ნაკლებად მძიმე დაზიანებას გულისხმობს. როგორც პრესცენტრში ამბობენ, ამ ეტაპზე არ შეუძლიათ იმის თქმა, მამუკა მახარაძე იარაღით არის თუ არა დაჭრილი. მათი თქმით, ამ კითხვაზე პასუხის გაცემა მხოლოდ ექსპერტიზის დასკვნის შემდეგ იქნება შესაძლებელი.

 

საქმეს ქედის პოლიცია იძიებს.

 

 

მასალების გადაბეჭდვის წესი