ზურაბიშვილი საჯარო სამსახურის კანონში დაგეგმილ ცვლილებასთან კავშირს უარყოფს

სალომე ზურაბიშვილი საჯარო სამსახურის შესახებ საქართველოს კანონში დაგეგმილ ცვლილებასთან კავშირს უარყოფს, რომლის მიღების შემთხვევაშიც პრეზიდენტის ადმინისტრაციის ათობით თანამშრომელი საჯარო მოხელე აღარ იქნება და შესაძლოა ყოველგვარი კომპენსაციის გარეშე გათავისუფლდნენ სამსახურიდან.

“ეს კანონმდებლობა მე არ მეხება, მე არ მაქვს მიღებული კანონი. საკანონმდებლო ორგანოს ეხება ეს და იქ უნდა მიმართოთ თქვენი კითხვები. ვინ რას აცხადებს, არ ვიცი, მაგრამ საკანონმდებლო ორგანო ჩემთან არ არის დაკავშირებული, ის დამოუკიდებელია. პრეზიდენტი სხვა რამეა, პრეზიდენტის ადმინისტრაცია კიდევ ცალკე. მე არ მაქვს მიღებული ჯერ გადაწყვეტილება ამის შესახებ,” – განუცხადა ჟურნალისტებს არჩეულმა პრეზიდენტმა.

პრეზიდენტის ამჟამინდელი საპარლამენტო მდვიანი პარლამენტს მოუწოდებს, არ მიიღოს საჯარო სამსახურის შესახებ კანონში ცვლილებები. ანა ნაცვლიშვილი საჯარო სამსახურის შესახებ კანონში ცვლილებების იმ პროექტს აპროტესტებს, რომელიც საპარლამენტო უმრავლესობის წევრებმა, გურამ მაჭარაშვილმა და რატი იონათამიშვილმა შეიმუშავეს და პრეზიდენტის ადმინისტრაციის თანამშრომლების სამსახურში მიღების ახალ წესს არეგულირებს.

საქართველოს პრეზიდენტის ადმინისტრაციის უფროსი ცალსახად დისკრიმინაციულად და ანტიკონსტიტუციურად მიიჩნევს “საჯარო სამსახურის შესახებ“ კანონში შესატან ცვლილებებს. გიორგი აბაშიშვილი დაგეგმილ ცვლილებებს “ვერაგულ და ლაჩრულ გადაწყვეტილებად” აფასებს.

ინფორმაციის თავისუფლების განვითარების ინსტიტუტი (IDFI) აცხადებს, რომ ინიცირებული ცვლილება ლახავს პრეზიდენტის ადმინისტრაციაში დასაქმებული საჯარო მოხელეების უფლებებს, რისკის ქვეშ აყენებს საქართველოში ეფექტური, მდგრადი და პოლიტიკურად ნეიტრალური საჯარო სექტორის ჩამოყალიბებას და მთლიანობაში საჯარო მმართველობის რეფორმის წარმატებით განხორციელებას. IDFI ასევე მოუწოდებს საქართველოს პარლამენტს, მხარი არ დაუჭიროს შემოთავაზებულ საკანონმდებლო ცვლილებებს, ხოლო კანონპროექტის ავტორებს მოუწოდებს, გაიწვიონ ინიცირებული საკანონმდებლო ცვლილების პროექტი.

რას ითვალისწინებს კანონპროექტი?

ცვლილების თანახმად, საჯარო სამსახურის შესახებ საქართველოს კანონის 78-ე მუხლის პირველი პუნქტის „გ“ ქვეპუნქტი შემდეგი რედაქციით ყალიბდება:

მუხლი 78: ადმინისტრაციული ხელშეკრულებით დასაქმებული პირები და მათი საჯარო სამსახურში მიღება

1. ადმინისტრაციული ხელშეკრულებით საჯარო სამსახურში მიიღებიან:

ა) სახელმწიფო-პოლიტიკური თანამდებობის პირის თანაშემწე;
ბ) სახელმწიფო-პოლიტიკური თანამდებობის პირის მრჩეველი;
გ) სახელმწიფო-პოლიტიკური თანამდებობის პირის უშუალო აპარატის/ სამდივნოს/ბიუროს თანამშრომელი. აგრეთვე საქართველოს პრეზიდენტის ადმინისტრაციის სხვა თანამშრომელი, გარდა ამ კანონით გათვალისწინებული გამონაკლისებისა და შრომითი ხელშეკრულებით დასაქმებული პირებისა.

სწორედ ეს ბოლო ნაწილია კანონპროექტში დამატებული.

როგორც კანონის განმარტებით ბარათშია აღნიშნული, პრეზიდენტის ადმინისტრაციის თანამშრომლები, რეალურად, წარმოადგენენ რა საქართველოს პრეზიდენტის უფლებამოსილებების განხორციელებაში ხელშემწყობ პირებს, უნდა იყვნენ ადმინისტრაციული ხელშეკრულების საფუძველზე დასაქმებული.

პრესსამსახურის ცნობით, ეს ცვლილებები 11 დეკემბერს პარლამენტის საპროცედურო საკითხთა კომიტეტზე უნდა განხილულიყო, თუმცა პარლამენტში მისულ ნაცვლიშვილს და მის მოადგილეს კომიტეტის ჩანიშნული სხდომა გადადებული დახვდათ.

როგორც მარგველაშვილის ადმინისტრაციის პრესსამსახური იუწყება, ნაცვლიშვილი აცხადებს, რომ შემოთავაზებული ცვლილებით, ადმინისტრაციაში დასაქმებული ადამიანები აღარ იქნებიან საჯარო მოხელეები და, შესაბამისად, მათზე, როგორც საჯარო სამსახურში დასაქმებულ ადამიანებზე, არანაირი დაცვის გარანტიები აღარ გავრცელდება.

“დაუსაბუთებლობა”

ამ ცვლილებას, ნაცვლიშვილის შეფასებით, “თან არ ახლავს არანაირი სათანადო დასაბუთება, არ არის გააზრებული, მათ შორის არ არის დანახული მთელი რიგი მნიშვნელოვანი საკითხები, რომელთა დაცვისკენაც უნდა იყოს მიმართული საკანონმდებლო პოლიტიკა და არა პირიქით”.

“როდესაც საქართველომ განახორციელა საჯარო სამსახურის რეფორმა, მივიღეთ მაღალი სტანდარტის კანონმდებლობა, მათ შორის, ჩვენი საერთაშორისო პარტნიორები, ევროკავშირი და სხვა პარტნიორები საქართველოს ევროპასთან დაახლოების გზაზე ძალიან მნიშვნელოვნად მიიჩნევდნენ, რომ ერთხელ და სამუდამოდ ამ ქვეყანაში შეიქმნას საჯარო მოხელეების რგოლი, რომელიც იქნება კომპეტენტური, პროფესიონალი ადამიანებით დაკომპლექტებული რგოლი და არ მოხდება ამ ადამიანების ცვლილება პოლიტიკური ხელმძღვანელობის შეცვლასთან ერთად. ეს არის ძალიან მნიშვნელოვანი კონცეფცია თავის მხრივ, იმიტომ, რომ არ შეიძლება საჯარო მოხელეები, პროფესიული ნიშნით შერჩეული ადამიანები იყვნენ მიბმული პოლიტიკური ხელმძღვანელობის ცვლილებასთან”, – ამბობს ნაცვლიშვლი.

მისივე თქმით, კანონპროექტის ახლანდელი ვერსია ამ რეფორმის სულისკვეთებას “მთლიანად ეწინააღმდეგება”.

ნაცვლიშვილმა იმედი გამოთქვა, რომ “ასეთ მნიშვნელოვან გადაწყვეტილებას ნაჩქარევად არ მიიღებენ”.

“გეტყვით კონსულტაციების შემდეგ”

რუსთავი2-ის ჟურნალისტის კითხვაზე, რის გამო შემოვიდა მსგავსი შინაარსის კანონპროექტი პარლამენტში მარგველაშვილის ვადის ამოწურვამდე რამდენიმე დღით ადრე, — ეს ხომ ნიშნავს, რომ ყველას მარტივად გაუშვებენ, — კანონპროექტის ინიციატორმა გურამ მაჭარაშვილმა უპასუხა: “კონსულტაციები მიდის და გეტყვით ზუსტად… რა ფორმულირებით იქნება და როგორი იქნება, მაგას გეტყვით ზუსტად კონსულტაციების შემდეგ”.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.