პრემიერ-მინისტრს არ დაუკონკრეტებია, რომელი ეგზიტპოლის შედეგები იგულისხმა.

“მე მინდა გამარჯვება მივულოცო ჩვენს კანდიდატებს”, -განაცხადა მან.

“ჩვენი მონაცემებით და ეგზიტპოლის მონაცემებით, ქართულმა ოცნებამ მოიგო არჩევნები საქართველოს ყველა დიდ ქალაქში”,- განაცხადა ირაკლი ღარიბაშვილმა.

თავისი გამოსვლის დასასრულს პრემიერ-მინისტრმა მიკროფონი  დავით ნარმანიას დაუთმო და მოიხსენია როგორც “თბილისის მერი”.

თუმცა რუსთავი 2-ის ეგზიტპოლის შედეგებით თბილისში მეორე ტური უნდა გაიმართოს, რადგან კანონის თანახმად თბილისის მერობის კანდიდატმა 50%-იანი ბარიერი უნდა გადალახოს,  “ქართული ოცნების” კანდიდატმა დავით ნარმანიამ მხოლოდ  46.3% მიიღო. რუსთავი 2 -ის ცნობით ცდომილება ამ მონაცემებში 3%-ია. 

დავით ნარმანიამ 50 %-იანი ბარიერი გადალახა ტელეკომპანია “იმედის” დაკვეთით ჩატარებული ეგზიტპოლის შედეგების მიხედვით.