პროკურორ მერაბ ჯერანაშვილის განცხადებით, სასამართლომ ჯერ მხოლოდ სარეზოლუციო ნაწილი გამოაცხადა და როდესაც სრულად გამოქვეყნდება განაჩენი, მას პროკურატურა სააპელაციო სასამართლოში გაასაჩივრებს. მისი თქმით, ის დარწმუნებულია, რომ სააპელაციო სასამართლო ამ გადაწყვეტილებას შეცვლის:

“ბრალდების მხარე, ცხადია, არ ელოდა ამ განაჩენს იმ მარტივი მიზეზის გამო, რომ დღესაც მიგვაჩნია, რომ ერთადერთი სწორი, ობიექტური და კანონიერი გადაწყვეტილება, რაც მოსამართლეს უნდა მიეღო, იქნებოდა გამამტყუნებელი განაჩენი. როგორც მოწმეთა ჩვენებებით, ასევე, წერილობითი მტკიცებულებები უტყუარად ადასტურებდნენ კეზერაშვილის მიერ როგორც ქრთამის აღებას, ასევე, ორგანიზებული ჯგუფის მიერ დიდი ოდენობით, საბაჟო წესის დარღვევით, მოძრავი ნივთის გადატანას, საიდანაც მუღებული აქვს უკანონო შემოსავალი 13 მილიონი ლარი. ცხადია, სააპელაციო წესით გავასაჩივრებთ და დარწმუნებული ვართ სააპელაციო სასამართლო მიიღებს გამამტყუნებელ გადაწყვეტილებას”, – განაცხადა პროკურორმა.

დაცვის მხარე კი განაჩენს სამართლიანს უწოდებს. ადვოკატი გიორგი ჩივიაშვილი ამბობს, რომ ისინი სააპელაციო სასამართლოს მეირ ჯანაშვილის განაჩენის შეცვლის თაობაზე მიმართავენ:

“მეირ ჯანაშვილი გამართლებულ იქნა ქრთამის მიცემის დახმარებაში, ხოლო დამნაშავედ იქნა ცნობილი საბაჟო წესის დარღვევაში, რასაც, ბუნებრივია, ჩვენ გავასაჩივრებთ, რადგან ამ ნაწილში განაჩენს არ ვეთანხმებით”, – აღნიშნა ჩივიაშვილმა.

საჯარო მოხელის მიერ განსაკუთრებით დიდი ოდენობით ფულის მოთხოვნის და ქრთამის მიღების, ასევე, საფინანსო საქმიანობის სფეროში დანაშაულის ჩადენის ფაქტებზე, საქართველოს ფინანსთა სამინისტროს საგამოძიებო სამსახურის თანამშრომლებმა ყოფილი თავდაცვის მინისტრი და ფინანსური პოლიციის ყოფილი უფროსი, დავით კეზერაშვილი ბრალდებულად გასული წლის 30 იანვარს ცნეს.