აჭარის პოლიციამ ბათუმში მომხდარი დაჭრის ფაქტზე 2003 წელს დაბადებული პირი დააკავა. ამის შესახებ შინაგან საქმეთა სამინისტრო იუწყება.

გამოძიების ვერსიით, დაკავებულმა გუშინ, 17 ნოემბერს ბათუმში, ლერმონტოვის ქუჩის მიმდებარე ტერიტორიაზე, ურთიერთშელაპარაკებისას, 14 წლის მოზარდს ცივი იარაღის გამოყენებით ჭრილობები მიაყენა და შემთხვევის ადგილიდან მიიმალა.

სამართალდამცველებმა ის ცხელ კვალზე, ბათუმში დააკავეს.

შსს-ს ცნობით, დაჭრილი საავადმყოფოშია გადაყვანილი, მის სიცოცხლეს კი საფრთხე არ ემუქრება.

გამოძიება სსკ-ს 19-108, განზრახ მკვლელობის მცდელობის მუხლით მიმდინარეობს, რაც 7-დან 15 წლამდე ვადით თავისუფლების აღკვეთას ითვალისწინებს.

http://batumelebi.netgazeti.ge/news/168922/