ფოტო: მარიამ კვარაცხელია

აქცია პარლამენტთან: შეკრებილები ამბობენ, რომ არ დაიშლებიან და კარვებს დაიცავენ

პოლიციის წინააღმდეგობის მიუხედავად, რუსტაველის გამზირზე, პარლამენტის წინ სარალიძე/მაჩალიკაშვილის მხარდამჭერი აქციის ორგანიზატორებმა კარვები მაინც გაშალეს. ამ დროისათვის ადგილზე 10-მდე ასეთი კონსტრუქციაა განტავსებული.

აქციის ორგანიზატორები, არასამთავრობო ორგანიზაციების წარმომადგენლები აცხადებენ, რომ ღამით არსად წავლენ და კარვებში დარჩებიან, რათა დაიცვან თავიანთი კონსტიტუციური უფლება და მშვიდობიანად გამოხატონ პროტესტი.

ფოტო: მარიამ კვარაცხელია

ფოტო: მარიამ კვარაცხელია

აღნიშნულ გადაწყვეტილებას წინ უძღოდა დაპირისპირება მოქალაქეებსა და პოლიციას შორის პარლამენტის მიმდებარედ. პოლიციელები შეეცადნენ, დემონსტრანტებისთვის ჯერ კიდევ გაუშლელი კარვები წაერთმიათ, რასაც მოქალაქეთა წინააღმდეგობა მოჰყვა. გაწევ-გამოწევისას ხორავას ქუჩაზე მოკლული დავით სარალიძის მამა, ზაზა სარალიძე შეუძლოდ გახდა. მოგვიანებით, როცა მისი მდგომარეობა გაუმჯობესდა, სარალიძემ განაცხადა:

“ეს იყო კალაძის და ხელისუფლების პასუხი ჩემს მიმართ. მე ამათ თავს შევაკლავ და ბრძოლას გავაგრძელებ”.

შემდგომ მან მმართველი გუნდის მიერ მხარდაჭერილ პრეზიდენტობის კანდიდატ სალომე ზურაბიშვილს მიმართა; მოუწოდა, პარლამენტთან მივიდეს და აქციის მონაწილეებს კანონით გათვალისწინებული უფლების აღსრულებაში დაეხმაროს.

“კარვებით ვიცავთ თავისუფლებას!” – ამ სახელწოდებით აქცია პარლამენტის წინ გუშინ დაიგეგმა. არასამთავრობო ორგანიზაციებმა მოქალაქეებს მოუწოდეს, დღეს, 20:00-ზე პარლამენტთან შეკრებილიყვნენ. აქციაზე აპროტესტებენ როგორც სარალიძე/მაჩალიკაშვილისთვის კარვის გაშლაში ხელშეშლას, ისე მერიის მოთხოვნას მათდამი, შეცვალონ აქციის ჩატარების ადგილი 7 დეკემბრამდე, ნაძვის ხის დადგმის საჭიროების გამო.

აქციის ორგანიზატორთა შორის არიან არასამთავრობო ორგანიზაციები: “საფარი”, “სამართლიანი არჩევნები”, “საია”, “კონსტიტუციის 42-ე მუხლი”, საქართაშორისო გამჭვირვალობა – საქართველო” და “საქართველოს დემოკრატიული ინიციატივა”.

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან