ცენტრალური საარჩევნო კომისიის ინფორმაციით, თუშეთში, გადასატანი საარჩევნო ყუთის სიაში რეგისტრირებულია 28 ამომრჩეველი, კერძოდ, სხვადასხვა პოსტზე მყოფი მესაზღვრეები.

როგორც ცენტრალური საარჩევნო კომისიის პრესპიკერმა ანა მიქელაძემ განაცხადა, მათგან მხოლოდ 4 შეძლებს არჩევნებში მონაწილეობის მიღებას, ხოლო დანარჩენებთან ვერ მოხერხდება გადასატანი ყუთის მიტანა უამინდობისა და დაკეტილი გზების გამო.

ინფორმაცია იმის შესახებ, რომ თუშეთში საპრეზიდენტო არჩევნები არ ჩატარდება, დღეს reginfo-მ გაავრცელა.

გარდა ამისა, ცესკო-ს პრესპიკერის თქმით, გავრცელდა ინფორმაცია, რომ გორში 4 საარჩევნო უბანი დაკეტილი იყო, თუმცა საარჩევნო ადმინისტრაციამ გადაამოწმა და აღნიშნული სიმართლეს არ შეესაბამება.

ახალგაზრდა იურისტთა ასოციაციამ ცესკო-ს მიაწოდა ინფორმაცია, რომ ნაძალადევის №74-ე საარჩევნო უბანზე იმყოფებოდა არაუფლებამოსილი პირი დამკვირვებლის სამკერდე ნიშნით, რომელიც არ იყო ცესკო-ს მიერ დადგენილი წესით გაცემული.

“გადამოწმების შედეგად, აღნიშნული დადასტურდა და საუბნო საარჩევნო კომისიამ დაატოვებინა არაუფლებამოსილ პირს საარჩევნო უბანი; ახმეტის ოლქში ყველა საარჩევნო უბანი გახსნილია და ჩვეულებრივ მიმდინარეობს კენჭისყრის პროცესი”, – განაცხადა ანა მიქელაძემ.