ახალი ამბები

სიტყვიერ შეურაცხყოფაზე პოლიცია თვალს ხუჭავდა – ნათია მეზვრიშვილი სარალიძის დაკავებაზე

26 ოქტომბერი, 2018 • 1572
სიტყვიერ შეურაცხყოფაზე პოლიცია თვალს ხუჭავდა – ნათია მეზვრიშვილი სარალიძის დაკავებაზე

შინაგან საქმეთა მინისტრის მოადგილე ნათია მეზვრიშვილმა ზაზა სარალიძის დაკავებასთან დაკავშირებით ჟურნალისტებთან კომენტარი გააკეთა. მისი თქმით, ზაზა სარალიძემ სიტყვიერი შეურაცხყოფა არაერთხელ მიაყენა პოლიციას, თუმცა მისი მდგომარეობის გათვალისწინებით პოლიცია ამაზე თვალს ხუჭავდა. ნათია მეზვრიშვილის თქმით, დღეს პოლიცია იძულებული გახდა ემოქმედა და ფიზიკური თავდასხმის ფაქტზე დაეკავებინა ის.

“სამწუხარო ფაქტი მოხდა დღეს რუსთაველის გამზირზე. ფაქტიურად ბოლო თვეების განმავლობაში ჩვენ ვნახეთ არაერთი  შემთხვევა, როდესაც ბატონი ზაზა სარალიძე პოლიციის მიმართ სიტყვიერი შეურაცხყოფის ხერხებს მიმართავდა. თუმცა გვესმოდა ადამიანურად მისი მდგომარეობა და ამ მდგომარეობის გათვალისწინებით პოლიცია მთელი ამ თვეების განმავლობაში უბრალოდ იდგა და ყველაფერზე თვალს ხუჭავდა. ვგულისხმობ სიტყვიერი შეურაცხყოფის ფაქტებს. თუმცა უკვე დღეს,  სამწუხაროდ, პოლიცია იძულებული გახდა, რომ ემოქმედა, რადგან ეს უკვე იყო აშკარა ფიზიკური შეურაცხყოფის ფაქტი, აშკარა თავდასხმის ფაქტი, რამაც პოლიციას სხვა გზა არ დაუტოვა, გარდა იმისა, რომ მის მიმართ იძულების ღონისძიება – დაკავება გამოყენებულიყო. ზაზა სარალიძე არის ს.ს.კ.-ს 353-ე პრიმა მუხლით დაკავებული, რაც პოლიციელზე თავდასხმას გულისხმობს“, – განაცხადა ნათია მეზვრიშვილმა.

საქართველოს შინაგან საქმეთა სამინისტრომ ზაზა სარალიძის მიმართ გამოძება სისხლის სამართლის კოდექსის 353-ე პრიმა მუხლით დაიწყო, რაც სამსახურეობრივი მოვალეობის შესრულების დროს პოლიციელზე თავდასხმას გულისხმობს და ბრალის დამტკიცების შემთხვევაში ისჯება თავისუფლების აღკვეთით 4-დან 7 წლამდე.

მასალების გადაბეჭდვის წესი