მოძრაობა “დავითიანნის” ორგანიზებით, თბილისში მინიფეხბურთის ტურნირი ჩატარდება, სადაც ერთმანეთს დედაქალაქში მდებარე 12 ყველაზე ცნობილი და დიდი ეკლესიის მრევლი დაუპირისპირდება. უკვე ცნობილია 10 ეკლესია, რომლის მრევლიც მინიფეხბურთის ტურნირში ჩაერთვება, ესენია:
- სამების მონასტრის მრევლი;
- ვაკის ანდრია პირველწოდებულის ეკლესიის მრევლი;
- კვირიკე და ივლიტას ტაძრის მრევლი;
- ვაკის სამების ტაძრის მრევლი;
- დიდი დიღმის 100 000 მოწამის ტაძრის მრევლი;
- სპირიდონ ტრიმიფუნტელის ტაძრის მრევლი;
- ოქროყანის ღვთისმშობლის ტაძრის მრევლი;
- ქაშუეთის მრევლი;
- სიონის ტაძრის მრევლი;
- ჯვრის მამის ეკლესიის მრევლი.
როგორც “დავითიანნში” განგვიცხადეს, ამ ეკლესიების მრევლებს შორის მინიფეხბურთის ტურნირი 20 ოქტომბერს, 19:00 საათზე, მუშტაიდის ბაღში მდებარე “იმედის” მოედანზე დაიწყება.
“რადგანაც ჯერ საპილოტეა და პირველი პრეცედენტია, გადავწყვიტეთ, 12 ყველაზე დიდ და ცნობილ ტაძრის მრევლს შორის ჩაგვეტარებინა ტურნირი”, – განუცხადეს ნეტგაზეთს “დავითიანნში”.
მრევლებს შორის მინიფეხბურთის ტურნირთან დაკავშირებით 20 ოქტომბერს, დღის პირველ ნახევარში, 12:00 საათზე, სამების გალავანში პრესკონფერენცია და სავარაუდოდ წილისყრაც გაიმართება.