რუსეთში საპენსიო რეფორმების წინააღმდეგ მიმართულ აქციებზე დაკავებულ დემონსტრანტთა რიცხვმა 1000-ს გადააჭარბა. პოლიციამ ოპოზიციის დაკავებული ლიდერის, ალექსეი ნავალნის მიერ ორგანიზებული საპროტესტო გამოსვლები რუსეთის ათობით ქალაქში გუშინ, 9 სექტემბერს ძალის გამოყენებით დაშალა.
ОВД-Инфо-ს ცნობით, რომელიც აქციებზე პოლიციის ქმედებებს მონიტორინგს უწევს, ყველაზე მეტი, 452 ადამიანი პეტერბურგში დააკავეს. შემდეგ მოდის ქალაქი ეკატერინბურგი, სადაც 183-ზე მეტი ადამიანია დაკავებული, დედაქალაქ მოსკოვში კი პოლიციამ 43 ადამიანი აიყვანა. ტელეკომპანია Дождь-ის ინფორმაციით, დაკავებულებს შორის ბავშებიც არიან.
რეფორმის მიხედვით, რომელსაც გასულ კვირას რუსეთის მასშტაბით ათობით ათასი ადამიანი აპროტესტებდა, კაცების შემთხვევაში, 2028 წელს საპენსიო ასაკი 60-დან 65 წლამდე იწევს, ქალებისთვის კი, 2034 წელს 55-დან 63 წლამდე. ჯანდაცვის მსოფლიო ორგანიზაციის მონაცემებით, რუსეთში კაცების სიცოცხლის საშუალო ხანგრძლივობა 66 წელია, ქალებისა კი, 77. პროფკავშირები და ცვლილების სხვა მოწინააღმდეგეები ამბობენ, რომ არაერთი ადამიანი აწეულ საპენსიო ასაკამდე ვერც კი მიაღწევს.
BBC-ის ცნობით, გასულ კვირაში დაგეგმილი ცვლილებები რუსეთის მასშტაბით ათობით ათასმა ადამიანმა გააპროტესტა. მათ შორის არიან როგორც ასაკოვანი მოქალაქეები, ისე ახალგაზრდები, რომლებიც შიშობენ, რომ საპენსიო ასაკის აწევა მათთვის სამუშაოს პოვნას მეტად გაართულებს. აქციის მონაწილეები სკანდირებდნენ: “პუტინი ქურდია!”, “რუსეთი იქნება თავისუფალი!”, “ძირს მეფე!” და ა.შ. გამოსვლები იმართება ორგანიზატორის – ალექსეი ნავალნის გარეშე, რომელსაც სასამართლომ ჯერ კიდევ აგვისტოში 30-დღიანი პატიმრობა შეუფარდა.
დაგეგმილი რეფორმების გადახედვას პრეზიდენტი პუტინი არ აპირებს. მისი თქმით, არსებული მოცემულობა ინფლაციის და სიღარიბის რისკებს ზრდის და ცვლილებების ვადები აღარ გადაიწევს.
ლევადა ცენტრის მონაცემებით, მიმდინარე პროცესები პუტინის რეიტინგზეც აისახა. “რუსეთის საზოგადოებრივი აზრის კვლევის ცენტრის” მონაცემებით, რუსეთის პრეზიდენტის პოპულარობა ბოლოს ასეთი დაბალი 2011 წლის ანტისამთავრობო დემონსტრაციების დროს იყო.