ჯანდაცვის სამინისტროს სოციალური დაცვის დეპარტამენტის უფროსი გია კაკაჩია აცხადებს, რომ ბოლო ორი დღის წინ დაწყებული თოვლისა და ყინვის გამო კარვებში მყოფთა რაოდენობა არ გაზრდილა, თუმცა ამის მოლოდინი არსებობდა:

“მეც  მქონდა მოლოდინი, შეიძლებოდა რაოდენობა ცოტა გაზრდილიყო, მაგრამ გუშინ არ იყო გაზრდილი. ახალი წლის პერიოდი იყო პიკი, როცა რაოდენობა 220-მდე ავიდა, მერე წავიდა კლება, იანვრის დასაწყისში 170 ადამიანამდე ცხოვრობდა კარვებში.  ბოლო ორი კვირაა ისევ ორას გადაცდა მაცხოვრებელთა რაოდენობა, 207- 208. ჩვენც გვქონდა მოლოდინი, რომ ამინდის გამო დაგვიჭირდებოდა გაფართოვება, მაგრამ ჯერჯერობით არაფერი არ არის”. – ამბობს ის. 

აღმოსავლეთ საქართველოში, მათ შორის თბილისში ამინდი 31 იანვარს გაუარესდა. 3 თებერვლის ღამეს კი გარემოს ეროვნული სააგენტო ტემპერატურის დაცემას – 11 გრადუს ყინვამდე ვარაუდობს.  ყველაზე დაბალი ტემპერატურა თბილისში მოსალოდნელია 4 თებერვალს, როცა სინოპტიკოსები ტემპერატურის დაცემას თბილისში -13 გრადუს ყინვამდე ელიან, ხოლო კახეთში შესაძლოა ტემპერატურა -18, -20 გრადუსამდე დაეცეს. 

გია კაკაჩია “ნეთგაზეთთან” საუბრისას აცხადებს, რომ კარვები, სადაც ადამიანები ცხოვრობენ, მოსალოდნელ ყინვებს გაუძლებს:

“კარვის მიზანი ესაა, რომ სითბო იყოს. გამათბობელი მუდმივად ჩართულია და კარავი თბოიზოლირებულიცაა შიგნიდან.  ეს სამხედროებისათვის განკუთვნილი საცხოვრებელი კარვებია, შესაბამისად, ყინვას გაუძლებს და მაგ კუთხით არ იქნება პრობლემა”. – ამბობს ის. 

გარემოს ეროვნული სააგენტო ამინდის გაუმჯობესებას 6 თებერვლიდან ვარაუდობს