ნეტგაზეთი | ბახტაძის თქმით, პედაგოგებს ხელფასი მხოლოდ საათების დამატების ხარჯზე გაეზრდებათ ბახტაძის თქმით, პედაგოგებს ხელფასი მხოლოდ საათების დამატების ხარჯზე გაეზრდებათ – Netgazeti
RU | GE  

ბახტაძის თქმით, პედაგოგებს ხელფასი მხოლოდ საათების დამატების ხარჯზე გაეზრდებათ

პრემიერობის კანდიდატის, მამუკა ბახტაძის თქმით, მომავალი სასწავლო წლიდან საქართველოს სკოლებში დამატებით 7 000 სერტიფიცირებული მასწავლებელი დაიწყებს საქმიანობას. ხელფასებზე საუბრისას კი მან განმარტა, რომ სერტიფიცირებულ მასწავლებელს 800-ლარიანი ხელფასი მხოლოდ საათების დამატების შემთხვევაში ექნება.

მამუკა ბახტაძის ამ კომენტარს წინ უძღოდა პარლამენტარ სერგო რატიანის კითხვა, რომელიც ეხებოდა სერტიფიცირებული მასწავლებლების ხელფასს. როგორც რატიანმა განმარტა, დღესდღეობით 58 ათასი მასწავლებლიდან სერტიფიცირებული მხოლოდ 16 ათასია, თუმცა მათ შორის დაპირებული 800-ლარიანი ხელფასი მხოლოდ 5 ათასს აქვს.

რატიანმა ასევე განაცხადა, რომ “ამ უსამართლობის” აღმოსაფხვრელად 40 მლნ ლარია საჭირო და ბახტაძეს ჰკითხა,  აქვს თუ არა პოლიტიკური მზაობა, პრობლემა გადაჭრას.

როგორც პრემიერობის კანდიდატის პასუხიდან ვიგებთ, მასწავლებლებს ხელფასები იმ შემთხვევაში გაეზრდებათ, თუ ისინი დამატებით  საათებს აიღებენ.

“მართლაც, ჩვენ გვყავს მასწავლებლების რაოდენობა, რომელსაც აქვს ნაკლები საათი. და რომ ჰქონდეთ სრული საათი, მიიღებენ გაზრდილ ანაზღაურებას. ჩვენ ყველა მასწავლებლებს შევთავაზებთ, რომ იმუშაონ იმ საათების რაოდენობით, რაც საჭიროა და დანარჩენი უკვე მათ ნებაზეა დამოკიდებული. რა თქმა უნდა, ყველას, ვისაც სურს სრული დატვირთვით იმუშაოს და მიიღოს გაზრდილი ანაზღაურება, ამის საშუალება ექნებათ. მინდა ისიც გითხრათ, რომ წელს იყო პირველი პრეცედენტი გარე დაკვირვების. შესაბამისად,  ყველა ის მასწავლებელი, რომლებმაც ამ ფორმატში კომპეტენცია დაადასტურეს, შეიცვლის სტატუსს და მოემატება ხელფასი. ახალი წლიდან დამატებით 7 000 მასწავლებელი დაიწყებს ახალი სტატუსით საქმიანობას და მათი საერთო რაოდენობა გადააჭარბებს 25 ათას ადამიანს,” – განაცხადა მამუკა ბახტაძემ პარლამენტის რიგგარეშე სხდომაზე, რომელიც დღეს, 20 ივნისს გაიმართა.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან