აქციის ორგანიზატორებმა პრემიერ-მინისტრს გიორგი კვირიკაშვილს 10 საათამდე მისცეს ვადა იმისთვის, რომ განაცხადოს, გრძნობს თუ არა პასუხისმგებლობას 12 მაისს თბილისის ორ კლუბში ჩატარებულ სპეცოპერაციაზე. ერთ-ერთი ორგანიზატორის ბექა წიქარიშვილის განცხადებით, თუ პრემიერი 10 საათმდე განცხადებას არ გააკეთებს, აქციის მონაწილეები კარვების გაშლას დაიწყებენ.
“მოვითხოვთ პრემიერ-მინისტრისგან დღეს, საღამოს 10 საათმდე, პირდაპირ ეთერში გააკეთოს საჯარო განცხადება, გრძნობს თუ არა საკუთარ პასუხისმგებლობას იმისთვის, რაც გააკეთა. ან თუ ვერ გრძნობს საკუთარ პასუხისმგებლობას, ვის აკისრებს მას ამ გაუგონარ ძალადობაზე. მან უნდა დაასახელოს კრიზისის გადაჭრის კონკრეტული გეგმა. წინააღმდეგ შემთხვევაში კარვების გაშლას დავიწყებთ,”-აცხადებს ბექა წიქარიშვილი.
თბილისში, პარლამენტის შენობის წინ, აქცია “ჩვენი თავსიფულებისთვის” მიმდინარეობს. მათი მთავარი მოთხოვანაა, დასჯაზე ორიენტირებული ნარკოპოლიტიკა შეიცვალოს, ასევე 12 მაისს თბილისის ღამის კლუბებში ჩატარებული სპეცოპერაციების გამო პრემიერმა და შინაგან საქმეთა მინისტრმა თანამდებობა დატოვონ.
- სამართალდამცავებმა სპეცოპერაცია “გალერისა” და “ბასიანში” 12 მაისს, შუაღამისას, დაახლოებით პირველ საათზე, ერთდროულად დაიწყეს;
- როგორც შსს ამბობს, ნარკოტიკების რეალიზაციის ბრალდებით 8 პირი დააკავეს, თუმცა ოპერაციის პარალელურად პოლიციამ კლუბების მიმდებარედ შეკრებილი ათეულობით ადამიანი დააკავა;
- სპეცოპერაციის წინააღმდეგ პროტესტი პარლამენტთან გაგრძელდა. ათეულობით პოლიციელმა დემონსტრანტებს აქციის თავისუფლად ჩატარების უფლება არც აქ მისცა და ადამიანების დაკავება რუსთაველის გამზირზეც გააგრძელა;
- დაკავებულთა შორის იყვნენ “თეთრი ხმაურის მოძრაობის” წევრი ბექა წიქარიშვილი და “გირჩის” პრეზიდენტობის კანდიდატი ზურაბ ჯაფარიძე.
- პოლიციამ ადმინისტრაციული წესით დაკავებული ყველა პირი დილით ხელწერილით გაათავისუფლა. უცნობია, როდის განიხილავს ამ პირებზე შედგენილი ადმინისტრაციული სამართალდარღვევების საქმეებს სასამართლო.
- შსს-მ 12 მაისს გამართულ ბრიფინგზე თქვა, რომ ნარკორეალიზაციის ბრალდებით დაკავებულთა წინააღმდეგ მოსამართლის განჩინების საფუძველზე ჩაწერილი ვიდეომტკიცებეულები აქვს.
