როგორ გამოიყურება მოხატული მიწისქვეშა გადასასვლელი გმირთა მოედანზე [ფოტო]

თბილისის მერიის ინიციატივით, გმირთა მოედანზე მიწისქვეშა გადასასვლელი მოიხატა. პროექტში 30-მდე მხატვარი ჩაერთო.

“[ჩემი ნახატის გზავნილია], რომ ყველას თავის ფერად და ნათელ ბუნებას ჩაუკვირდეს, მიტოვებული გვაქვს ადამიანებს, ჩვენი ცხოვრებიდან გამომდინარე, ზღაპრული და მისტიკური, რაც ჩვენში არის, უფრო სხარტ და კონსიუმერისტულ ცხოვრებას ვართ აყოლილი”, – ასე ახასიათებს ნატო ლაზარაშვილი გმირთა მოედნის ერთ-ერთ კედელზე შესრულებულ თავისი ნამუშევრის გზავნილს.

მხატვარი ნატო ლაზარაშვილი გვიყვება, რომ მიწისქვეშა გადასავლელის ის ნაწილი შეარჩია, რომელიც ღია სივრცეში მდებარეობს, რადგან მის ნახატს ცა და მწავნე საფარი კარგად ერწყმის.

ხელოვანი ამბობს, რომ აქამდე ქუჩის მოხატვა არ უცდია, რაც ახალი გამოწვევაა მისთვის. მისი თქმით, ქუჩის მხატვრობა პირდაპირაა დაკავშირებული გარემოსთან.

“ამ შემთხვევაში შენ ვარაზისხევიდან გინდა გადახვიდე კოსტავაზე და ეს გეფეთება. ქუჩის მხატვრობას აქვს გზავნილი. ზოგი ექსპონატი მუზეუმშია, [ზოგიც] გალარეიდან მიდის სახლში. ქუჩის მხატვრობა ეს უფრო ურბანულია, უფრო მასშტაბური. სხვა დატვირთვა აქვს, თითქოს უფრო მასობრივი პროდუქციის არის, მაგითი ფასობს. თან დროში ძაან შეზღუდულია მათი ცხოვრება, ან გადაღებავენ, ან სხვა მხატვარი გადაღებავს. ძალიან ცოცხალია, თავისი დაბადება, სიცოცხლე და კვდომა აქვს”, – ამბობს ნატო ლაზარიშვილი.

რუსი არტისტი A36e, რომელიც შემთხვევით ჩაერთო პროექტში, მიწიქვეშა გადასასვლელის იმ კედელს ხატავს, რომელიც დახურულ სივრცეში მდებარეობს. მისი ნამუშევარი წითელ ფონზე შესრულებულ შავ და თეთრ ხაზებს ქმნის.

A36e-ს ნამუშევარი თავისივე სახელის ასოების მონახაზებია, რომელიც ფორმებსა და ფერებთანაა შეხამებული.

“ვიღაცას მოეწონება, ვიღაცას არა. ასე უკეთესია, ვიდრე მოუვლელი, შეუხედავი გარემო. ვინმე გაჩერდება და შეხედავს და იფიქრებს “რა არის?’ “რის შესახებაა ეს?”. [ჩემი ნახატის გააზრება] დამოკიდებულია ადამიანზე, ვინც ამას უყურებს”, – ამბობს ხელოვანი.

მერიის ცნობით, დედაქალაქში არსებული მიწისქვეშა გადასასვლელების მოხატვის მსურველები თბილისის მერიასა და „თბილსერვის ჯგუფს“ სოციალური ქსელისა და ცხელი ხაზის საშუალებით დაუკავშირდნენ, რის შემდეგაც, „თბილსერვის ჯგუფის“ ორგანიზებით, მხატვრებისგან შემდგარი საინიციატივო ჯგუფი ჩამოყალიბდა.

თბილისის მერის, კახა კალაძის დაპირებით, ეტაპობრივად მოიხატება „თბილსერვის ჯგუფის“ მოვლა-პატრონობაში არსებული სხვა მიწისქვეშა გადასასვლელებიც.