ახალი ამბები

იონათამიშვილი პრეზიდენტს ბიზნესის წილის გასხვისებაში დახმარებას სთხოვს

1 ივლისი, 2013 • • 960
იონათამიშვილი პრეზიდენტს ბიზნესის წილის გასხვისებაში დახმარებას სთხოვს

საჯარო რეესტრის მონაცემებით, შპს საბურთალო 2007 –ში საკონტროლო პაკეტი – 78 პროცენტი, ბელქორ ჰოლდინგს ეკუთვნის, რომელიც ოფშორშია რეგისტრირებული. კონსტატნტინე იონათამიშვილი კომპანიაში 2 პროცენტს ფლობს, 5 პროცენტი ეკუთვნის ზაზა გუგავას, ხოლო 15 პროცენტის მფლობელი ნინო ბადაგიძეა.   

 

დახმარება მიხეილ სააკაშვილს საკრებულოს დეპუტატმა პირადი წერილით სთხოვა, რომელსაც პრეზიდენტის ადმინისტრაცია ავრცელებს:

 

კოკი იონათამიშვილი
კოკი იონათამიშვილი

“ვერასდროს წარმოვიდგენდი, რომ მოგმართავდით ასეთ კერძო და პრივატულ თემაზე… ვერასდროს ვიფიქრებდი, რომ ასე გავკადნიერდებოდი, მაგრამ ცხოვრებში ყველაფერი ხდება. საოცრად გაფასებთ, მაგრამ ამ წერილში ამაზე საუბარი არ გამომივა. მინდა გითხრათ, რომ არ ვთვლი, რომ რაიმე ისეთი მაქვს გაკეთებული, რომ ასე მომემართა თქვენთვის… მაგრამ რაც არის, არის… წერაც კი მიმძიმეს და პირადად ხომ ამის თქმას საერთოდ ვერ მოვახერხებდი. მოკლედ, პრობლემა მაქვს, ისეთი, როგორც ბევრს, არაფერი ორიგინალური, ვალებმა, რომ იტყვიან, დამახრჩო. მოკლედ რომ გითხრათ, მსურს გთხოვოთ დახმარება… ისეთი პრობლემური გარემო მაქვს, რომ გავკადნიერდი და მოგმართეთ. თუ თქვენ შეგიძლიათ მიშუამდგომლოთ რომელიმე ბიზნესმენთან, მე მაქვს წილი ერთ “ბიზნესში”, რომელსაც რიგი ობიექტური და სუბიექტური ფაქტორებისა ვერ ვყიდი და თუ ვინმე თქვენი შუამდგომლობის ხარჯზე დამეხმარებოდა, ჩემთვის ეს… არც კი ვიცი, რა სიტყვა შევარჩიო, უპირობო გამოსავალს და გადარჩენას ნიშნავს. “ეს ბიზნესი” ცუდი არ არის, მაგრამ დღეს მხოლოდ თქვენი შუამდგომლობის ხარჯზე თუ დაინტერესდება ვინმე… თუ, რა თქმა უნდა, ამ თავხედობას შემინდობთ და დამეხმარებით, არც კი ვიცი, რა სიტყვები შევარჩიო, ეს ჩემი გადარჩენა იქნება. რაღაცებში უბრალოდ სასტიკად არ გამიმართლა. გიგიმ ნაწილობრივ იცის ეს პრობლემები და რამდენიმეჯერ მაგრად მომეხმარა კიდეც, რის გამოც მისი მადლობელი ვარ, მაგრამ საბოლოოდ მოგვარება არ გამოვიდა…  მე მაქვს წილი ფირმა “საბურთალო 2007”-ში, 2 %. ამ ფირმას აქვს საკუთარი ქონება, შენობა, რომელშიც განთავსებულია ტექნიკის ჰიპერმარკეტი “გალაქსი”, პეკინის 46-ში. “გალაქსი” ქირაობს ფართს ჩვენგან, აქვს 15- წლიანი იჯარა, ყოველთვიურად ვიღებ 1000 დოლარზე მეტს ჩემს წილად. შენობის ფართია თითქმის 5 ათასი კვადრატული მეტრი, სარდაფის ჩათვლით. სხვა მეწილეებმა ახლა წილი ვერ იყიდეს. წილის გაყიდვა, 2 %-ის დათმობა, ჯამში, მსურს 100 ათას დოლარად”. 

 

“ნეტგაზეთი” კოკი იონათამიშვილთან დაკავშირებას შეეცადა, თუმცა მან სატელეფონო ზარს არ უპასუხა. 

 

 “ერთიანი ნაციონალური მოძრაობის” წევრმა კოკი იონათამიშვილმა პარტიის დატოვებასთან დაკავშირებით საკუთარ facebook გვერდზე განცხადება დღეს გაავრცელა. 

მასალების გადაბეჭდვის წესი