ახალი ამბები

ორი მოსმენით მოსესაც არ მიუღია ათი მცნება – პრეზიდენტი საკონსტიტუციო ცვლილებების მიღებაზე

15 აგვისტო, 2017 • 2700
ორი მოსმენით მოსესაც არ მიუღია ათი მცნება – პრეზიდენტი საკონსტიტუციო ცვლილებების მიღებაზე

დღეს, 15 აგვისტოს, საქართველოს პრეზიდენტმა გიორგი მარგველაშვილმა ბაზალეთის საზაფხულო სკოლაში სტუდენტებსა და უფროსკლასელებს პროექტი “წაიკითხე კონსტიტუცია მთელ საქართველოსთან ერთად” გააცნო. გიორგი მარგველაშვილმა სტუდენტებსა და უფროსკლასელებთან საუბრისას ყურადღება კონსტიტუციის ძირითად ღირებულებებსა და მათი დაცვის აუცილებლობაზე გაამახვილა. ასევე, საუბარი შეეხო საკონსტიტუციო პროცესში ახალგაზრდების აქტიური ჩართულობის მნიშვნელობას.

როგორც პრეზიდენტმა განაცხადა, დემოკრატიული საზოგადოების განსაკუთრებულობა მდგომარეობს იმაში, რომ ყველა მოქალაქე პოლიტიკოსია:

“იმიტომ, რომ ნებისმიერი ხელისუფლება მოდის და ხორციელდება თქვენი და თქვენი თანატოლების, თანამოქალაქეების გადაწყვეტილების ხარჯზე. როცა ჩვენ ვცხოვრობდით საბჭოთა კავშირში, ძალიან ცოტა ბედავდა, რომ განსხვავებულად ეაზროვნა იმიტომ, რომ ის იყო ტოტალიტარული სახელმწიფო. დღეს თქვენ ცხოვრობთ დემოკრატიულ საზოგადოებაში, და არ არსებობს მოქალაქე, რომელიც არ არის პოლიტიკოსი, რომელიც არ არის პასუხისმგებელი იმაზე, რაც ქვეყანაში ხდება. თითოეული ის ადამიანი, ვისაც თქვენ დაელაპარაკებით და ვინც თქვენ გეტყვით, რომ მე კონსტიტუცია არ მაინტერესებს, რეალურად უარს ამბობს იმაზე, ვინც თვითონ არის, საქართველოს მოქალაქეობაზე. ამიტომ ძალიან დიდი მადლობა მინდა გითხრათ, რომ ამ პროექტში მონაწილეობთ, რომ ამ ძალიან ამაღელვებელ და მნიშვნელოვან ფრაზას “ჩვენ საქართველოს მოქალაქენი„ რეალობად აქცევთ, ეს არის ის თავისუფალი გადაწყვეტილება, რომელსაც თქვენ ახორციელებთ.”

საქართველოს პრეზიდენტს საზაფხულო სკოლის მონაწილეებმა კითხვებიც დაუსვეს, ახალგაზრდების ინტერესი მიმდინარე საკონსტიტუციო რეფორმასაც უკავშირდებოდა. სტუდენტები დაინტერესდნენ, მისაღებია თუ არა ქვეყნის პირველი პირისთვის ცვლილებების შინაარსი და განხორციელების ფორმა.

„არ ვეთანხმები პროცესს, ეს კონსტიტუცია თითოეული ჩვენგანისაა და ის ფორმა, რაც ამ პროცესმა მიიღო, მიუღებელია. ჯერ ჩაკეტილ კარს მიღმა მუშაობა, მერე რა, რომ ამ ჩაკეტილ კარს მიღმა ჭკვიანი იურისტები და კონსტიტუციონალისტები მუშაობდნენ. კონსტიტუცია ხომ თითოეული მოქალაქისაა. ღმერთმა მე მომცა თავისუფლება და არა ვიღაც კონსტიტუციონალისტს. შესაბამისად, ის ჩემს თავისუფლებაზე რომ ლაპარაკობს და მთავარ დოკუმენტს წერს, მეც უნდა ჩამრთოს ამ პროცესში. მერე უცებ მოხდა ამ კონსტიტუციის გამოტანა და ორი მოსმენით უსწრაფესად მიღება. ორი მოსმენით, მგონი, მოსესაც კი არ მიუღია ათი მცნება, რომლითაც დღეს ვცხოვრობთ,” – აღნიშნა გიორგი მარგველაშვილმა.

პრეზიდენტის განცხადებით, ბოლო დროს კონსტიტუციასთან დაკავშირებით განვითარებული მოვლენები პოკერის თამაშს ჰგავს. “ამ ბოლო დროს ეს პროცესი პოკერის თამაშივით არის. ერთმანეთს უცხადებენ რაღაცებს. ეს ყველაფერი კი ისე მიდის, რომ საზოგადოება კვლავ არაა ჩართული. ახალი გამოცხადებაა ბუნებრივი ბარიერი თუ რაღაც ასეთი. საჭიროა ღია, ჩართული პროცესი. ეს პროცესი კი ყველაზე მეტად არ მომწონს. ასევე არ მომწონს ბონუსის სისტემა”, – განაცხადა საქართველოს პრეზიდენტმა.

ბაზალეთის საზაფხულო სკოლა პროექტის “ჩვენ, საქართველოს მოქალაქენი” ფარგლებში ფუნქციონირებს, რომელსაც მოძრაობა “ინიციატივა” ახორციელებს. ფინანსურ მხარდაჭერას კი პრეზიდენტის სარეზერვო ფონდი უწევს. შეხვედრას ესწრებოდნენ საქართველოს პრეზიდენტის ადმინისტრაციის უფროსი გიორგი აბაშიშვილი, უშიშროების საბჭოს მდივანი დავით რაქვიაშვილი, საპარლამენტო მდივანი ანა დოლიძე და პრეზიდენტის მრჩეველი ეთნიკური უმცირესობების საკითხებში სოფიო შამანიდი.

საქართველოს პრეზიდენტმა გიორგი მარგველაშვილმა ბაზალეთის საზაფხულო სკოლაში სტუდენტებსა და უფროსკლასელებს პროექტი “წაიკითხე კონსტიტუცია მთელ საქართველოსთან ერთად” გააცნო. ფოტო: პრეზიდენტის ადმინისტრაცია

საქართველოს პრეზიდენტმა გიორგი მარგველაშვილმა ბაზალეთის საზაფხულო სკოლაში სტუდენტებსა და უფროსკლასელებს პროექტი “წაიკითხე კონსტიტუცია მთელ საქართველოსთან ერთად” გააცნო. ფოტო: პრეზიდენტის ადმინისტრაცია

მმართველი პარტიის ლიდერი, არჩილ თალაკვაძე კვალიფიციურ ოპოზიციურ პარტიებს მიმდინარე კვირაში საკონსტიტუციო ცვლილებებზე დიალოგის განახლებას სთავაზობს. არჩილ თალაკვაძის თქმით, მნიშვნელოვანია, სტრასბურგში შეხვედრამდე კიდვ ერთხელ განიხილონ საკონსტიტუციო რეფორმის ყველა მნიშვნელოვანი საკითხი.

მმართველი გუნდის შეთავაზებას საკონსტიტუციო ცვლილებებზე დიალოგის განახლებასთან დაკავშირებით კვალიფიციური ოპოზიციური პარტიების ნაწილი თანხმდება, მათ შორის: “ევროპული საქართველო”, “ნაციონალური მოძრაობა” და “ახალი საქართველო”.

ხელისუფლების შეთავაზებას აკრიტიკებენ “პატრიოტთა ალიანსი”, “ლეიბორისტული პარტია” და ნინო ბურჯანაძის გუნდი. ისინი მიიჩნევენ, რომ ხელისუფლება ოპოზიციის მოსყიდვასა და ჩიხიდან გამოსვლას ცდილობს.

მასალების გადაბეჭდვის წესი