საზღვაო ტანსაცმლის კოლექცია ახალგაზრდებისთვის [ფოტო]

ტანსაცმლის ატელიემ “კიკალა” ახალგაზრდული ხაზის მეორე კოლექცია წარადგინა, რომელიც სპეციალურად ზღვის სეზონისათვის შეიქმნა. კოლექციაში ბამბის კაბებთან ერთად ხელოვნური ქსოვილებისაგან შეკერილი მაისურებიცაა.

ატელიეს სამხატვრო დირექტორი ელენე გელაშვილია, რომელიც ატელიესთვის კოლექციებზე თებერვლიდან მუშაობს. როგორც ამბობს, კიკალა Youth-ის ხაზისათვის შეიქმნა მარტივი ტანსაცმელი, რომელიც სატარებლად სასიამოვნოა, მაგრამ ასევე გამორჩეული. ამ კოლექციაშიც არის 15 სხვადასხვა “ლუქი”.

“კოლექციაში არის გამოყენებული ძირითადად ბამბის ქსოვილი, ასევე არის სინთეტიკაც, რადგან კოლექციის ინსპირაცია არის აღებული ზღვის პლაჟებიდან, რომლებიც სამწუხაროდ, არის ცუდ მდგომარეობაში. ხშირად ყრია პოლიეთილენის პარკები და ამ სინთეტიკური, ხელოვნური, ქიმიური, არაბუნებრივი მასალების გამოყენებით მინდოდა ამ განცდის შექმნა. თუმცა ვთვლი, რომ საკმაოდ საინტერესოდ გამოვიყენე. კოლექცია არის ზუსტადაც, რომ ზღვისთვის შექმნილი, ზღვის სეზონზე სატარებლად,” – ამბობს ელენე.

ატელიეში ამბობენ, რომ ახალგაზრდული ხაზი ბევრად იაფი იქნება, ვიდრე მათი ძირითადი კოლექციები.

ელენეს თქმით, ამ ზაფხულსაც მოდის მთავარი ტენდენცია არის სიმარტივე, რომელიც უკვე 10 წელია გრძელდება. მოდაშია “ოვერსაიზები”, ანუ დიდი ზომის ტანსაცმელი. აკ ზაფხულში საკმაოდ პოპულარული იქნება ტანისამოსი ერთ მხარეს გახსნილი მხრით. “კიკალას” კოლექციის დიდი ნაწილია ე.წ. “კაბა-მაისურები”.

“რაც საკმაოდ კარგად გამოიყურება გოგონებზე და მოთხოვნაც შესაბამისად დიდია. ყველას სურს ჰაეროვანი, მსუბუქი ტანსაცმლის ტარება. დღეს, თანამედროვე მოდის ყველაზე დიდი შთაგონება ეს არის უბრალოდ ქუჩაში შემომხვედრი ადამიანი, რომელიც შეიძლება ავტობუსის გაჩერებაზე დაინახო. ინდივიდუალურ ხასიათზე მორგებული ხდება სამოსი,” – ამბობს ელენე გელაშვილი.

კოლექციის შეძენა “კიკალა Youth”-ის ვებ-გვერდზეა შესაძლებელი.

Kikala Youth – ახალგაზრდული ტანსაცმლის ხაზი. ატელიამ ზაფხულის კოლექცია წარმოადგინა 22.07.17 ფოტო: ნეტგაზეთი/გუკი გიუნაშვილი

დიზაინერი ელენე გელაშვილი. Kikala Youth – ახალგაზრდული ტანსაცმლის ხაზი. ატელიამ ზაფხულის კოლექცია წარმოადგინა 22.07.17 ფოტო: ნეტგაზეთი/გუკი გიუნაშვილი