სააკაშვილის წერილი რომის პაპს

საქართველოს პრეზიდენტი მიხეილ სააკაშვილი რომის პაპს წერილს უგზავნის, რომელშიც იმედს გამოთქვამს, რომ კათოლიკური სამყაროს ურთიერთობა საქართველოს მიმართ კვლავ მტკიცე და თანმიმდევრული იქნება:

“თქვენო უწმინდესობავ,

მრავალეთნიკური და მრავალკონფესიური საქართველოს სახელით, თქვენ და მთელ კათოლიკურ სამყაროს ამ უმნიშვნელოვანეს დღეს გილოცავთ.

გვჯერა, რომ ამიერიდან საქართველოსა და ვატიკანის ურთიერთობა კიდევ უფრო გაღრმავდება და მრავალფეროვანი გახდება, კათოლიკურ თემს კი საქართველოში ახალ ძალა შეემატება. 

მინდა იმედი გამოვთქვა, რომ კათოლიკური სამყარო ისეთივე თანმიმდევრული და მტკიცე იქნება საქართველოსთან ურთიერთობაში, როგორც ეს არა მარტო საქართველოს დამოუკიდებლობის აღდგენის პირველ წლებში, არამედ საუკუნეების განმავლობაში იყო. განუზომელია კათოლიკური თემის წვლილი ჩვენი ქვეყნის ისტორიაში. თითოეული მათგანი ჩვენი საზოგადოების მნიშვნელოვანი ნაწილია და აქ მათ ყოველთვის უდიდესი პატივისცემით ეპყრობოდნენ. ეს თემი საუკუნეების განმავლობაში იღვწოდა ქართული სახელმწიფოს სულიერი და კულტურული სიმდიდრის შესაქმნელად და არაერთი ბრწყინვალე ახალგაზრდა საზოგადო მოღვაწე, მეცნიერი და ხელოვანი გამოზარდა.

მწამს, რომ თქვენ, როგორც ვატიკანის სახელმწიფოს მეთაური და კათოლიკეთა სულიერი მწყემსი, ისეთივე სიყვარულით განაგრძობთ საქართველოსთან ურთიერთობას, როგორც არაერთი თქვენი წინამორბედი”, – ნათქვამია მიხეილ სააკაშვილის წერილში. 

 

რომის ახალი, 266–ე პაპი არგენტინელი კარდინალი ხორხე მარიო ბერგოლიო გახდა. პაპი, რომლის სახელიც ფრანცისკი იქნება, კათოლიკურმა სამყარომ 13 მარტს აირჩია.

ნეტგაზეთის მასალების სხვა გამოცემებში გადაბეჭდვის წესი
netgazeti.ge