ახალი ამბები

თბილისში “ჭინჭრაქას” სახელობის სკვერი იქნება

30 მაისი, 2017 • 2220
თბილისში “ჭინჭრაქას” სახელობის სკვერი იქნება

დღეს, 30 მაისს, თბილისის საკრებულოში, სახელდებისა და სიმბოლიკის კომისიის სხდომაზე უსახელო ქუჩებისა და სკვერების სახელდების საკითხები განიხილეს, სადაც გადაწყდა, რომ თბილისის ერთ–ერთ სკვერს “ჭინჭრაქა” დაერქმევა.

კომისიის წევრების გადაწყვეტილებით, ნაძალადევის რაიონში, ურეკისა და ანაპის 414-ე დივიზიის ქუჩების გადაკვეთაზე მდებარე უსახელო სკვერს მწერლის – ოთარ ჭილაძის სახელი დაერქმევა, სამგორის რაიონში, პეტრე და იოსებ ოცხელების ქუჩასთან არსებული სკვერს კი “ჭინჭრაქას” სახელი მიენიჭება.

თბილისის მუნიციპალიტეტის საკრებულოში სახელდებისა და სიმბოლიკის კომისიის სხდომა გაიმართა, რომელსაც კომისიის თავმჯდომარე ლია ჯახველაძე უძღვებოდა. დეპუტატებმა უსახელო ქუჩებისა და სკვერების სახელდების საკითხები განიხილეს და საბურთალოს რაიონში, ლიხაურის ქუჩის შესახვევისთვის მწერლისა და დრამატურგის, კიტა ბუაჩიძის სახელების მინიჭებას დადებითი რეკომენდაცია მისცეს.

დღესვე დეპუტატებმა დედაქალაქში რომელიმე უსახელო ქუჩისთვის ფილოლოგის, პროფესორ რევაზ სირაძის სახელის მინიჭების თაობაზე საკრებულოს თავმჯდომარის გიორგი ალიბეგაშვილის ინიციატივა განიხილეს.

როგორც კომისიის თავმჯდომარემ აღნიშნა, საკრებულოს სხდომაზე საკითხის დადებითად გადაწყვეტის შემთხვევაში, რევაზ სირაძის სახელი კრწანისის რაიონში, ხეივნის I ქუჩასა და მასთან არსებულ ორ ჩიხს მიენიჭება. კომისიის წევრებთან ერთად სხდომას ასევე ის მოქალაქეები ესწრებოდნენ, რომლებმაც კომისიას აღნიშნული ქუჩების სახელდების ინიციატივით მიმართეს.

მასალების გადაბეჭდვის წესი