კონკურსის საფუძველზე შეირჩევა სამი ექსპერტი, რომელთაც უნდა შეიმუშავონ საქართველოს სასჯელაღსრულების დაწესებულებებში C ჰეპატიტის პრევენციის, დიაგნოსტირებისა და მკურნალობის პროგრამული დოკუმენტი.

დოკუმენტი უნდა მოიცავდეს შემდეგ მონაცემებს:

– რამდენი მსჯავრდებულის მკურნალობა მოხდება წლის განმავლობაში;

– პაციენტის შერჩევის კრიტერიუმები;

– მკურნალობის სტანდარტული სქემა;

– პროგრამის განხორციელებისათვის საჭირო ფინანსური რესურსები;

– ტესტ-სისტემების, მედიკამენტებისა და გვერდითი მოვლენების მართვის მომსახურების შესყიდვის კრიტერიუმები საერთაშორისო პრაქტიკის გათვალისწინებით;

– პაციენტთა თვითდახმარების ჯგუფების ჩამოყალიბების კრიტერიუმები;

– სკრინინგ -პროგრამის შემუშავება;

– C ჰეპატიტის დიაგნოსტირებისა და მკურნალობის ეროვნული პროტოკოლის სასჯელაღსრულების სისტემაზე ადაპტირება.

სამუშაოს შესასრულებლად გათვალისწინებული ვადა არ უნდა აღემატებოდეს 30 კალენდარულ დღეს.

სამუშაო ჯგუფის მონაწილეების შესარჩევად საკვალიფიკაციო მოთხოვნებია: საზოგადოებრივი ჯანდაცვის ან ეპიდემიოლოგიის სპეციალისტი C ჰეპატიტის თემატიკაზე მუშაობის გამოცდილებით; ეკონომისტი – სასურველია ჯანდაცვის სფეროში მუშაობის გამოცდილებით; ინფექციონისტი – სპეციალისტი, რომელიც სიღრმისეულად ერკვევა C ჰეპატიტის დიაგნოსტირება/მკურნალობის საკითხებში.

სასჯელაღსრულების დაწესებულებებში C ჰეპატიტის პრევენციის, დიაგნოსტიკისა და მკურნალობის პროგრამის შემუშავებას სასჯელააღსრულების სამინისტრო ფონდ “ღია საზოგადოება – საქართველოსთან” ერთად იწყებს.

საქართველოში C ჰეპატიტი ერთ-ერთ ყველაზე გავრცელებულ დაავადებას მიეკუთვნება.  2008 წელს ჩატარებული კვლევის მიხედვით, C ჰეპატიტით საქართველოში 200 000-მდე ადამიანია დაავადებული.

C ჰეპატიტი სერიოზულ  პრობლემას წარმოადგენს ასევე საქართველოს სასჯელაღსრულების დაწესებულებებში, რაზეც ადამიანის უფლებათა ევროპული სასამართლოს მიერ გამოტანილი გადაწყვეტილებებიც მეტყველებს, რომლითაც საქართველოს დაეკისრა სასჯელაღსრულების დაწესებულებაში C ჰეპატიტით დაავადებულთა მკურნალობა.