ახალი ამბები

ლუჟკოვი: სექტემბერში საქართველოში ქორწილში ჩასვლას ვგეგმავ

12 მაისი, 2017 • 5652
ლუჟკოვი: სექტემბერში საქართველოში ქორწილში ჩასვლას ვგეგმავ

მოსკოვის ყოფილი მერი იური ლუჟკოვი აცხადებს, რომ სექტემბერში საქართველოში ჩამოსვლის სურვილი აქვს, იმის მიუხედავად, რომ საქართველოს შინაგან საქმეთა სამინისტრო მის “შავ სიაში” შეყვანას გეგმავს. ინფორმაციას ამის შესახებ “რია ნოვოსტი” ავრცელებს. შს მინისტრის მოადგილემ, შალვა ხუციშვილმა ჟურნალისტების კითხვას, შემოუშვებენ თუ არა ლუჟკოვს საქართველოში, არ უპასუხა.

როგორც ლუჟკოვი ამბობს, ახლო მეგობრის შვილიშვილის ქორწილშია დაპატიჟებული და სურს საქართველოში ოჯახთან ერთად ჩამოვიდეს და დაესწროს ქართულ ქორწილს. მან შსს-ს გადაწყვეტილებას უგუნური და გაუგებარი უწოდა.

“საერთოდაც, მე ვგეგმავ, ჩემს საყვარელ საქართველოში სექტმბერში კიდევ ერთხელ წავიდე. დაპატიჟებული ვარ ქორწილში, რომელსაც ჩემი ახლო მეგობარი აწყობს შვილიშვილისთვის. მინდა, ცოლთან, ოჯახთან ერთად ვნახო ქართული ქორწილი. ეს საინტერესოა, ყოველთვის ძალიან მასშტაბური და ლამაზია.

თუ ეს არ გამოვა საქართველოს ხელისუფლების ქმედების გამო, ვფიქრობ, დაველოდებით სხვა დროს, ეს აუცილებლად მოხდება. და ასეთ ველურ გადაწყვეტილებას, ვფიქრობ, საქართველოს ხელისუფლება არ მიიღებს და არც უნდა მიიღოს,” – უთხრა მან “რია ნოვოსტს”

შინაგან საქმეთა სამინისტრო მოსკოვის ყოფილი მერის, იური ლუჟკოვის შავ სიაში შეყვანას გეგმავს, რათა საქართველოში ვეღარ შემოვიდეს.


 

მოსკოვის ყოფილი მერის, იური ლუჟკოვის საქართველოში ვიზიტის შესახებ ინფორმაცია და ფოტომასალა სქემარქიმანდრიტმა სერაფიმ ბით ხარიბმა გაავრცელა.

იური ლუჟკოვის მიმართ ოკუპირებული ტერიტორიების შესახებ კანონით გათვალისწინებული სანქციების (ჯარიმა) გატარების მოთხოვნით ინტერნეტში პეტიცია შეიქმნა.

9 მაისს შსს-მ განმარტა, რომ ოკუპირებულ ტერიტორიების შესახებ კანონით გათვალისწინებული დანაშაულის ჩადენისთვის ხანდაზმულობის ვადა 6 წელია, შესაბამისად, იური ლუჟკოვის წინააღმდეგ სამართლებრივ ნაბიჯებს ვერ გადადგამს.

ლუჟკოვი მოსკოვის მერი 1992-2010 წლებში იყო. მას მოსკოვის მერის პოსტი 18 წლის მანძილზე ეკავა და 2010 წლის 28 სექტემბერს, რუსეთის პრეზიდენტის შესაბამისი განკარგულების საფუძველზე, თანამდებობიდან გათავისუფლდა. იმავე წლის დეკემბრის ბოლოს მედვედევმა მედიასთან საუბარში ეს გადაწყვეტილება დედაქალაქში კორუფციის დონის მატებით ახსნა.

2006 წლის 20 ივლისს საქართველოს საგარეო საქმეთა სამინისტროში დაიბარეს საქართველოში რუსეთის საქმეთა დროებითი რწმუნებული, რომელსაც გადაეცა საპროტესტო ნოტა მოსკოვის მერის, იური ლუჟკოვის აფხაზეთში თბილისთან შეუთანხმებელი ვიზიტის თაობაზე. თბილისმა ლუჟკოვის სოხუმში ჩასვლა 2009 წელსაც გააპროტესტა.

2009 წელს ლუჟკოვი ცხინვალშიც იმყოფებოდა. მაშინ საქართველოს საგარეო უწყებამ დაგმო ლუჟკოვის ცხინვალში ჩასვლა და რუსეთის სხვა ლიდერების ვიზიტების მსგავსად შეაფასა, როგორც ”საქართველოს სახელმწიფო საზღვრის დარღვევა, საერთაშორისო სამართლის საყოველთაოდ აღიარებული ნორმებისა და პრინციპების იგნორირება და ოკუპირებულ ტერიტორიებზე რუსეთის მიერვე შექმნილი მარიონეტული რეჟიმების ლეგიტიმაციის მცდელობები”.

ამავე თემაზე – ლუჟკოვის განცხადებები საქართველოს ტერიტორიული მთლიანობის წინააღმდეგ 2004 – 2010 წლებში [თაიმლაინი]

მასალების გადაბეჭდვის წესი