დღეს, 2 მაისს, ქუთაისში ტრადიციული სახალხო დღესასწაული – “გვირილობა 2017 “, იგივე ქუთაისქალაქობა სხვადასხვა ღონისძიებებით აღინიშნება. გთავაზობთ ფოტორეპორტაჟს ქუთაისიდან.
“გვირილობის” აღნიშვნა ბაგრატის ტაძრიდან ქუთაისის დალოცვით დაიწყო. საზეიმო პარაკლისი ქუთათელ-გაენათელმა მიტროპოლიტმა მეუფე კალისტრატემ გადაიხადა. ბაგრატის ტაძარში, უცხოელ სტუმრებთან ერთად, ქუთაისის მერი შოთა მურღულია, იმერეთის გუბერნატორი გივი ჭიჭინაძე, საკრებულოს თავმჯდომარე დავით დვალი და მაჟორიტარი დეპუტატები იმყოფებოდნენ.
ქუთაისს “გვირილობის” დღესასწაულზე სხვადასხვა ქვეყნის დელეგაციები და ელჩები სტუმრობენ, მათ შორის ქუთაისთან დამეგობრებული ქალაქების ადგილობრივი ხელისუფლება.
გვირილობა 2017-ზე გოგონებმა გვირილები გაყიდეს. შემოსული თანხა „სოლიდარობის“ ფონდში გადაირიცხება.
ქუთაისში “გვირილობა” მე-20 საუკუნის დასაწყისში დამკვიდრებული საქველმოქმედო დღესასწაულია. “გვირილობა” გიმნაზიელ გოგონას, ალექსანდრა ჩიქოვანის ინიციატივას და საქველმოქმედო აქციას უკავშირდება. გიმნაზიელმა გოგონებმა გვირილების გაყიდვის აქცია მოაწყვეს, რომ ტუბერკულოზით დაავადებულებს დახმარებოდნენ. მომდევნო წლებშ “გვირილობას” ტრადიციის სახე მიეცა და ქალაქის დღესასწაულად იქცა.