განხილვის დასრულების შემდეგ დეპუტატებმა შეხვედრა შეაფასეს. საპარლამენტო უმრავლესობის წევრის ზაქარია ქუცნაშვილის თქმით, ქუთაისელები ქალაქის გადმოსახედიდან აფასებენ მოვლენებს და არა ქვეყნის:

“ქუთაისელების ის ნაწილი, რომელიც ქუთაისის პრესტიჟზე ფიქრობს და ქუთაისის გადმოსახედიდან უყურებს განვითარების საკითხს, სწორია, მაგრამ თუ საქართველოს გადმოსახედიდან, დავით აღმაშენებელის გადმოსახედიდან შეხედავს, რა თქმა უნდა, არასწორია”.

საპარლამენტო უმცირესობის წევრის, გია თევდორაძის თქმით, ქუთაისი მიესალმება თავის ახალ სტატუსს:

“ალბათ, ცხადი იყო ყველა დამსწრე ადამიანისთვის, რომ იქ შეკრებილი საზოგადოების აბსოლუტური უმრავლესობის განწყობა პარლამენტის გადატანის საკითხთან დაკავშირებით იყო ერთსულოვანი”.

შეხვედრას ასევე ორგანიზაცია “სამართლიანი არჩევნებისა და დემოკრატიის საერთაშორისო საზოგადოების” აღმასრულებელი დირექტორი ნინო ლომჯარია ესწრებდა:

“გამომსვლელთა უმრავლესობამ დააფიქსირა პოზიცია, რომ მათთვის არ არის მისაღები პარლამენტის გადატანა თბილისში. ეს იყო მათთვის ყველაზე მტკივნეული თემა და მათ შორის იყვნენ ადამიანები, როგორც ოპოზიციის, ასევე ხელისუფლების მხარდაჭერები, რომლებიც უჭერდნენ მხარს პარლამენტის ქუთაისში დარჩენას.”

საკონსტიტუციო ცვლილებების პროექტის საყოველთაო განხილვას დღეს ქუთაისში არ ესწრებოდა ქუთაისის მაჟორიტარი დეპუტატი გუბაზ სანიკიძე.

შეგახსენებთ, რომ საკონსტუტიციო განხილვა უკვე გაიმართა ზუგდიდში, სადაც მოქალაქეებმა აკაკი ბობოხიძის ავტომობილს კვერცხი ესროლეს. განხილვა, ქუთაისის გარდა, თბილისში (22 იანვარი), ოზურგეთში (23 იანვარი), ბათუმში (23 იანვარი), გორში (24 იანვარი), რუსთავში (25 იანვარი), თელავსა (25 იანვარი) და ახალციხეში (26 იანვარი) გაიმართება.