ეს განცხადება საქართველოს ფინანსთა მინისტრმა ნოდარ ხადურმა სახელმწიფო კანცელარიაში მთავრობის სხდომის დასრულების შემდეგ გააკეთა.
ხადურმა აქცენტი პარლამენტის შენობის ასაშენებლად გაწეულ ხარჯებზე გააკეთა: „პარლამენტის შენობის მშენებლობა ქუთაისში 140 მილიონ ლარზე მეტი დაჯდა. ეს შენობა პრაქტიკულად გამოუსადეგარია სამუშაოდ. ერთადერთი, რაც იქ კარგია, ეს არის დარბაზი.“
ხადურის განცხადებით, ქუთაისის პარლამენტში აპარატის მუშაობა პრაქტიკულად წარმოუდგენელია: „მე ვიყავი პარლამენტში როგორც წევრი. ადამიანებს ყურებში ბამბები აქვთ, კონდიცირება ისეთი ხმაურიანია.“
ფინანსთა მინისტრმა განაცხადა, რომ უნდა მოხდეს შესწავლა, რატომ არის ეს შენობა ასეთი უხარისხო, როცა ამდენი ფული დაიხარჯა:
„რატომ უნდა აეშენებინა საქართველოს ბიუჯეტს ანაკლიაში კაფე, რომლის მშენებლობაზეც 2 მილიონი ლარი დაჯდა. ბოლო სამი წლის განმავლობაში ასეთ ღონისძიებებზე ბიუჯეტიდან 1 მილიარდი ლარია დახარჯული“
ფინანსთა მინისტრი ამ ხარჯების შესახებ არსებულ მონაცემებს პროკურატურას გაუგზავნის. შესაძლოა, ამ პროცესში ფინანსთა სამინისტროს საგამოძიებო სამსახურიც ჩაერთოს.