ევროპარლამენტარი დიდი ბრიტანეთიდან, სტივენ ვულფი საქართველოს ევროკავშირში გაწევრიანების მოწინააღდეგეა. ამის მიზეზად კი ტერორიზმის საფრთხის გაზრდას ასახელებს. ვულფი ქართულენოვან გაზეთ “რეზონანსზე” დაყრდნობით აცხადებს, რომ ტერორისტული დაჯგუფება ISIS საქართველოს იყენებს, როგორც დერეფანს ევროკავშირის ქვეყნებში გადასასვლელად.

“დღეს მართლაც სასწაული ხდება. ძალიან მნიშვნელოვან პერიოდში ვიმყოფებით, რომელშიც ჩვენ უკვე ვიხილეთ შედეგები. ევროკავშირი და მისი სურვილი, რომ განაგრძოს გაფართოება, თავის ზეგავლენას ახდენს: პირველი გახლავთ ის, რომ შეიძლება უშვებდეს იმავე შეცდომებს, ვინაიდან ის არ ამოწმებს, ვინ შემოდის [ევროკავშირის წევრ ქვეყნებში]. მაშინ, როდესაც განსახილველი გახლავთ ტერორიზმის საფრთხე და საზღვრის საკითხები, ასევე, ISIS-ის დაჯგუფება, რომელიც სპეციალური ტრანსპორტით საქართველოს გავლით გადმოდიოდა. გასული წლის ივნისში ქართული გაზეთი  “რეზონანსი” იუწყებოდა, რომ 600–700 ტერორისტი გადმოვიდა საქართველოდან ევროპაში. გთხოვთ, ნუ დაუშვებთ შეცდომას, მიუხედავად იმისა, რომ გაგაჩნიათ სურვული, გააფართოოთ მასშტაბები,” – განაცხადა ევროპარლამენტარმა, სტივენ ვულფმა დიდი ბრიტანეთიდან.

ინფორმაცია იმის შესახებ, რომ “ისლამურმა სახელმწიფომ” საქართველოში გურჯისტანის ვილაიეთი შექმნა, გაზეთმა “რეზონანსმა” სამხედრო ანალიტიკოს ვახტანგ მაისაიაზე დაყრდნობით 2015–16 წლებში ორჯერ გაავრცელა, რასაც სახელმწიფო უსაფრთხოების სამსახურის უფროსმა, ვახტანგ გომელაურმა ტყუილი უწყოდა.

ნეტგაზეთმა ვახტანგ მაისაიასთან სცადა დაეზუსტებინა, რა ინფორმაციას ფლობს იგი. მან სატელეფონო საუბარში თქვა, რომ ეს ინფორმაცია აქვს, როგორც ღია, ასევე, თავისი წყაროებიდან, რომლის ვინაობასაც ვერ გაამხელს. რაც შეეხება ღია წყაროებს, ანალიტიკოსის თქმით, მსგავსი ინფორმაცია BBC-მ და CNN-მაც გაავრცელეს, თუმცა ნეტგაზეთმა შესაბამისი ნიუსები ვერ მოძებნა.

ეტივენ ვულფი, ევროპარლამენტარი დიდი პრიტანეთიდან. ფოტო: PA