2017 წლიდან ჯარში სავალდებულო გაწვევის გაუქმება თავდაცვის ყოფილი მინისტრის, თინა ხიდაშელის ინიციატივა იყო, თუმცა ეს არ ნიშნავდა სავალდებულო სამხედრო სამსახურის სრულად გაუქმებას. ხიდაშელის ინიციატივის მიხედვით, სავალდებულო გაწვევას მხოლოდ თავდაცვის სამინისტრო ეთიშებოდა, თუმცა შინაგან საქმეთა სამინისტრო და სასჯელაღსრულების სამინისტროს კვლავ შეეძლო 18-დან 27 წლამდე მოქალაქეების გაწვევა, რადგან მათთან მსახურება, კანონის თანახმად, სამხედრო სავალდებულო სამსახურად ითვლება. ხიდაშელის შემცვლელმა ლევან იზორიამ კი მინისტრად დანიშვნიდან მალევე განაცხადა, რომ სავალდებულო გაწვევას აღადგენდა.
ეროვნული უშიშროების საბჭოს წევრთა უმრავლესობამ 2016 წლის 21 ნოემბერს საბჭოს სხდომაზე მხარი დაუჭირა თავდაცვის სამინისტროს მიერ სავალდებულო სამხედრო გაწვევის აღდგენის საკითხსა და საგაზაფხულო გაწვევის განახლების პოზიციას. ინიციატივას მხარი დაუჭირა საქართველოს პრეზიდენტმა გიორგი მარგველაშვილმაც, რომელიც აცხადებს, რომ ამ გადაწყვეტილების მიზეზი “შეიარაღებული ძალებში პირადი შემადგენლობის თვალსაზრისით არსებული ვითარება” გახდა.
“საქმე ისაა, რომ 2013 წელს მიღებული სტრატეგიული დოკუნენტი, რომელიც განსაზღვრავდა ჩვენი შეიარაღებული ძალების განვითარებას, მიზნობრივად მიმართული იყო 2016 წელს სრულად პროფესიულ არმიაზე გადასასვლელად. ეს იყო ის დოკუმენტი, რომლითაც ჩვენ ვმუშაობდით, ფაქტობრივად, 4 მინისტრთან – ირაკლი ალასანიასთან, მინდია ჯანელიძესთან, თინა ხიდაშელთან და ლევან იზორიასთან.
ამ დოკუმენტის შემაჯამებელი ფაზა იყო, როდესაც თინა ხიდაშელმა შეაჩერა თავდაცვის უწყებაში საშემოდგომო გაწვევა. დღევანდელი შეფასებით, რაც ბატონმა მინისტრმა (ლევან იზორიამ) წარმოადგინა, თუ ასე მომავალშიც გავაგრძელებთ, ჩვენს შეიარაღებულ ძალებს გაუჩნდება პირადი შემადგენლობის სიმცირის პრობლემა, რასაც, ბუნებრივია, ჩვენ ვერ დავუშვებდით”, – განაცხადა პრეზიდენტმა საზოგადოებრივი მაუწყებლის პირველი არხის პირდაპირ ეთერში, თამარ ჩიქოვანის ტოკშოუ “მთავარში”.
“მინისტრის [იზორიას] გადაწყვეტილებას, რომ საგაზაფხულო გაწვევა ჩატარდეს ისე, როგორც აქამდე ტარდებოდა, ანუ არ გაუქმდეს, მხარი დავუჭირე როგორც მე, ასევე უშიშროების საბჭოს წევრთა უმრავლესობამ. ეს გამომდინარეობს იქიდან, რომ 2013-დან 2016 წლამდე რეალურად ბოლომდე ვერ განხორციელდა პროფესიულ ჯარზე გადასვლა და გამომდინარეობს იქიდან, რა ვითარებაც გვაქვს შეიარაღებულ ჯარებში პირადი შემადგენლობის თვალსაზრისით. მუდმივად საქართველოს უნდა ჰყავდეს ქმედუნარიანი შეიარაღებული ძალები, ქმედუნარიანი არმია და ამ ადამიანების გაწვევა საჭიროა იმისთვის, რომ ჩვენ გვქონდეს სრული შემადგენლობა ჩვენი ბრძოლისუნარიანი არმიის”, – ამბობს პრეზიდენტი.
2015 წლის საშემოდგომო გაწვევისას სამხედრო სავალდებულო-სამსახურში შსს-ს კვოტით სულ 1350 ადამიანი გაიწვიეს, სასჯელაღსრულების კვოტით – 998, ხოლო თავდაცვის უწყების კვოტით – 1050.