ბორდის წევრის, ქეთევან მსხილაძის თქმით, სავარაუდოდ, ბორდის მომავალ სხდომაზე იმსჯელებენ, თუ ვინ იქნება გენერალური დირექტორის მოვალეობის შემსრულებელი, სანამ მაუწყებელი ახალ დირექტორს აირჩევს. ბორდის სხდომს ჩატარების თარიღი და დღის წესრიგი დღეს გახდება ცნობილი.

ქეთევან მსხილაძე ამბობს, რომ ბარათაშვილს მიმართვაში არ დაუწერია მიზეზი, თუ რის გამო ტოვებს თანამდებობას: “თქვა, რომ შეთავაზებები აქვს და მუშაობის სხვაგან გაგრძელებაზე ფიქრობს, თუმცა არ უთქვამს, ვისგან და რა შემოთავაზეზები აქვს”.

გიორგი ბარათაშვილი ღია კონკურსის შედეგად საზოგადოებრივი მაუწყებლის სამეურვეო საბჭომ 2012 წელს აირჩია მაუწყებლის გენერალურ დირექტორად. მან ამ პოსტზე გია ჭანტურია ჩაანაცვლა.  “საერთაშორისო გამჭვირვალობა – საქართველოს” ინფორმაციით, გიორგი ბარათაშვილი მაუწყებელზე 2005 წლიდან მუშაობს. მას შემდეგ, რაც ის 2012 წლის ბოლოს გენერალურ დირექტორად აირჩიეს, 2013 წლის განმავლობაში  სამეურვეო საბჭომ ბარათაშვილი ორჯერ – მარტსა და სექტემბერში გაათავისუფლა თანამდებობიდან. საბოლოოდ, ბარათაშვილი თანამდებობაზე 2013 წლის დეკემბერში აღადგინეს. მას უფლებამოსილების ვადა 2018 წელს ეწურებოდა.

საზოგადოებრივი მაუწყებლის დირექტორის პოსტის დასაკავებლად კონკურსში მონაწილეობის მიღებას აპირებს რადიო “თბილისისა” და “ჰერეთის” დირექტორი, რამაზ სამხარაზე. ასევე, ჟურნალისტი ნინო ზაუტაშვილი, რომელსაც საზოგადოებრივი მაუწყებლის პირველ არხზე გადაცემა “რეალური სივრცე” მიჰყავს. შესაძლოა, კონკურსში მონაწილეობა მიიღოს “ტელეიმედისა” და “მეორე არხის” ყოფილმა დირექტორმა, ჟურნალისტმა კოკა ყანდიაშვილმა – ის ამბობს, რომ მხოლოდ იმ შემთხვევაში შეიტანს განაცხადს თანამდებობაზე, თუკი ეცოდინება, რა სურს საზოგადოებრივი მაუწყებლის სამეურვეო საბჭოს.