არასამთავრობო ორგანიზაცია “სამართლიანი არჩევნების” (ISFED) ხმების პარალელური დათვლის შედეგების თანახმად, ცენტრალური საარჩევნო კომისიის პროპორციული სიის კენჭისყრის საბოლოო მონაცემები შემდეგ შუალედებში უნდა მერყეობდეს:
| საარჩევნო სუბიექტი | გამოთვლილი პროცენტი | ცდომილების ზღვარი | მინიმალური შედეგი | მაქსიმალური შედეგი |
| ქართული ოცნება – დემოკრატიული საქართველო | 49.1% | 0.9% | 48.2% | 50.0% |
| ერთიანი ნაციონალური მოძრაობა | 26.8% | 0.9% | 25.9% | 27.7% |
| დავით თარხან – მოურავი, ირმა ინაშვილი – საქართველოს პატრიოტთა ალიანსი, გაერთიანებული ოპოზიცია | 4.9% | 0.3% | 4.6% | 5.2% |
| ირაკლი ალასანია – თავისუფალი დემოკრატები | 4.6% | 0.3% | 4.3% | 4.9% |
| პაატა ბურჭულაძე – სახელმწიფო ხალხისთვის | 3.5% | 0.3% | 3.2% | 3.8% |
| ნინო ბურჯანაძე – დემოკრატიული მოძრაობა | 3.4% | 0.2% | 3.2% | 3.6% |
| შალვა ნათელაშვილი – საქართველოს ლეიბორისტული მოძრაობა | 3.1% | 0.2% | 2.9% | 3.3% |
| უსუფაშვილი – რესპუბლიკელები | 1.5% | 0.1% | 1.4% | 1.6% |
არასამთავრობო ორგანიზაცია დარწმუნებულია ხმების პარალელური დათვლის PVT შედეგების სიზუსტეში. ორგანიზაციამ ინფორმაციას უბნებზე დამკვირვებელთა 99.7%-ისაგან მიიღო. არსებობს უფრო კონკრეტული მონაცემებიც, თუმცა ორგანიზაციამ უმჯობესად მიიჩნია შუალედური შედგების გამოცხადება, რადგან ზუსტი შედეგები ერთ-ერთ პარტიას შესაძლოა წარმოაჩენდეს, როგორც ბარიერგადალახულს.
ხმები პარალელურად დაითვალეს მთელი საქართველოს მასშტაბით.
ISFED-მა დარღვევების შესახებ ჯერჯერობით 94 საჩივარი წარადგინა საუბნო საარჩევნო კომისიებში და 120 საოლქო კომისიებში; 151 შენიშვნა დააფიქსირა შენიშვნების წიგნში.
“ხმების პარალელური დათვლის საფუძველზე მიღებული მონაცემებით, შეგვიძლია განვაცხადოთ, რომ ხმის დათვლის პროცესში გამოვლენილი დარღვევები იყო ცალკეული იზოლირებული შემთხვევები და მას არ შეიძლება არსებითი გავლენა ჰქონოდა პროპორციული სისტემით ჩატარებული არჩევნების შედეგებზე,” – აცხადებს მიხეილ ბენიძე, ორგანიზაციის აღმასრულებელი დირექტორი.
