ნეტგაზეთი | “ქართული ოცნება” “ქართულ ტყუილად” ჩამოყალიბდა – ენმ-ის პასუხი ირაკლი კობახიძეს “ქართული ოცნება” “ქართულ ტყუილად” ჩამოყალიბდა – ენმ-ის პასუხი ირაკლი კობახიძეს – Netgazeti
RU | GE  

“ქართული ოცნება” “ქართულ ტყუილად” ჩამოყალიბდა – ენმ-ის პასუხი ირაკლი კობახიძეს

ერთიანი ნაციონალური მოძრაობის ერთ-ერთი ლიდერი სერგო რატიანი ამბობს, რომ “ქართული ოცნების” აღმასრულებელმა მდივანმა ირაკლი კობახიძემ იცრუა, როდესაც ენმ საბურთალოზე მმართველი პარტიის ოფისში პროვოკაციის მცდელობაში დაადანაშუალა:

“4 წლის განმავლობაში მიზანმიმართული ტყუილი და ცილისწამებაა. ქართული ოცნება, საბოლოო ჯამში, ჩამოყალიბდა დიდ ქართულ ტყუილად. ეს სამწუხაროა, მაგრამ ფაქტია”, – განაცხადა რატიანმა.

“ქართული ოცნების” აღმასრულებელი მდივნის, ირაკლი კობახიძის განცხადებით, 18 სექტემბერს პარტიის ერთ-ერთი საარჩევნო შტაბში “ნაციონალური მოძრაობის” აქტივისტებმა პროვოკაციის მოწყობა სცადეს.

ირაკლი კობახიძის თქმით, ლევან გოგიჩაიშვილის საარჩევნო შტაბში “ქართული ოცნების” მაისურებში ჩაცმული სამი პირი შევიდა, რომელთაგან ორს თან პისტოლეტი ჰქონდა:

” ჩვენს ერთ-ერთ საარჩევნო შტაბში მივიდა “ნაციონალური მოძრაობის” სამი აქტივისტი, ისინი იყვნენ სევდია უგრეხელიძის შტაბის წევრები.  შევიდნენ ჩვენი მაჟორიტარი დეპუტატობის კანდიდატის, ლევან  გოგიჩაიშვილის ოფისში. ორ მათგანს ეცვა “ქართული ოცნების” მაისური და ქამარში ჩადებული ჰქონდათ პისტოლეტები. ისინი შევიდნენ ოფისში, დაიწყეს საუბარი ჩვენს აქტივისტებთან.  პროვოკაციის მიზანი იყო ამ ფაქტის გარედან გადაღება და მერე ტელევიზიით იმის ჩვენება, რომ თურმე “ქართული ოცნების” შტაბებში იკრიბებიან  შეიარაღებული ადამიანები და კრიმინალური მიდრეკილებების მქონე ადამიანები.”

კობახიძის განმარტებით, პარტიის აქტივისტებმა პოლიცია გამოიძახეს. ხოლო პოლიციამ დაადგინა, რომ ამ პირებს იარაღის ტარების უფლება ჰქონდათ. მისივე ცნობით, ერთ-ერთ პირს “ნაციონალური მოძრაობის” პარტიული ბილეთი ჰქონდა:

“ნაციონალური მოძრაობა” ვერ ცვლის მოქმედების სტილს, ისინი ბინძური პროვოკაციების მოფიქრებაში ძლიერები არიან და აშკარაა, რომ მათ ამ პროვოკაციების აღსრულების რესურსი აღარ აქვთ. მადლობა მინდა გადავუხადო ჩვენს აქტივისტებს, რომლებმაც სათანადო რეაგირება მოახდინეს ამ პროვოკაციაზე, დაუკავშირდნენ სამართალდამცავებს და მათ აღკვეთეს პროვოკაცია.  სამართალდამცავები ადგილზე გაერკვნენ ვითარებაში, მოხდა პირთა იდენტიფიცირება, იდენტიფიცირებულია მათი პარტიული კუთვნილება, ერთ-ერთ მათგანს თან ჰქონდა “ნაციონალური მოძრაობის” 2016 წელს გაცემული პარტიული ბილეთი. სამივე მათგანი არის ამ პარტიის აქტივისტი, ქალბატონი სევდია უგრეხელიძის შტაბის წარმომადგენლები.  იარაღი გაფორმებული ჰქონდათ, იარაღის უკანონო ტარებასთან საქმე არ გვაქვს, თუმცა ჩვენ ვსაუბრობთ ბინძურ პროვოკაციაზე.”

“ნეტგაზეთი” დაუკავშრიდა სევდია უგრეხელიძეს. მისი თქმით, საქმის კურსში არ არის და კომენტარს მოგვიანებით გააკეთებს.

შინაგან საქმეთა სამინისტროს განცხადებით, “ქართული ოცნების” ოფისში მათ მაისურებში გადაცმული და შეიარაღებული ენმ-ის წევრების შესვლის ბრალდებაზე გამოძიება იარაღის უკანონოდ შეძენა, შენახვა, ტარების მუხლით მიმდინარეობს.

შს სამინისტროში აცხადებენ, რომ გამოძიება სისხლის სამართლის კოდექსის 236-ე მუხლის მეორე ნაწილით მიმდინარეობს, თუმცა არის თუ არა ვინმე დაკავებული, ამ კითხვას არ პასუხობენ.

 

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com