სამტრედიის მუნიციპალიტეტის სოფელ დაფნარში 22 წლის დემურ სტურუამ პოლიციის მხრიდან სავარაუდო ზეწოლის გამო თავი ჩამოიხრჩო. მომხდარს გამოეხმაურა “თეთრი ხმაურის მოძრაობა”, რომელიც ქვეყანაში ნარკოპოლიტიკის ცვლილებისათვის მომუშავე აქტივისტებს აერთიანებს.
“თეთრი ხმაურის მოძრაობაში” მიაჩნიათ, რომ სახელმწიფოს მიერ დანერგილი ნარკომანიასთან ბრძოლის სტრატეგიის სავალალო შედეგები უამრავმა ადამიანმა იწვნია საკუთარ თავზე: “მისი ყოველდღიური პრაქტიკების დიდი ნაწილი ისევ უხილავი ქსელების მეშვეობით ფუნქციონირებს. ამგვარი ძალადობრივი ქსელების მუშაობის წინაპირობას წლების განამვლობაში პოლიციისთვის მიცემული გადაჭარბებული ძალაუფლება ქმნის, რომლის საზოგადოებრივი კონტროლის მექანიზმები დღემდე არ არსებობს”, – აცხადებენ აქტივისტები.
აქტივისტების შეფასებით, აღნიშნული ფაქტი სახელმწიფოს “სტრატეგიის ყველაზე უკიდურესი გამოვლინებაა. ჩვენ ჯერ კიდევ ვერ ვხედავთ პოლიციური ძალადობის სრულ სურათს და მის სავალალო შედეგებს, სწორედ ამიტომ, მომხდარი ძალადობის ფაქტი ჩვენგან მკაცრ რეაგირებას მოითხოვს”, – წერენ მოძრაობის წევრები.
“ამასთანავე უნდა აღინიშნოს, რომ მოქმედი ნარკოპოლიტიკის მიზანმიმართული შეტევა საზოგადოების ყველაზე მოწყვლად ფენებზე მიმდინარეობს, რაც საქართველოში არსებული დრამატული სოციალური უთანასწორობის უშუალო შედეგია. მომხდარი დანაშაული კიდევ ერთხელ გვარწმუნებს, რომ პოლიციური კონტროლის მექანიზმები საჯარო სივრცის მიღმა დარჩენილ, ხმაწართმეულ ადამიანებს განსაკუთრებული სიმკაცრით უსწორდება, მისი მოქმედების ძირითად სივრცეებს რეგიონები, სოფლები და გარეუბნები წარმოადგენენ”, – ნათქვამია “თეთრი ხმაურის მოძრაობის” მიერ გავრცელებულ განცხადებაში.
პოლიციელმა, რომელსაც დემურ სტურუა წერილში ასახელებს, გამოძიების დასრულებამდე თანამდებობა დატოვა. გამოძიებას საქართველოს მთავარი პროკურატურა აწარმოებს. მათი ცნობით, 8 აგვისტოს დაიწყეს გამოძიება შ.ს.ს. სამტრედიის რაიონულ სამმართველოში დემურ სტურუას თვითმკვლელობამდე მიყვანის ბრალდებით, საქართველოს სისხლის სამართლის კოდექსის 115-ე მუხლით.