თბილისის სააპელაციო სასამართლოს სამოქალაქო საქმეთა პალატის თავმჯდომარე, მზია თოდუა ქართული ოცნების შემომწირველია. გარდა ამისა, იგი უზენაესი სასამართლოს მოსამართლედ დანიშვნამდე “ქართუში” წამყვან თანამდებობებზე მუშაობდა.
რუსთავი 2-ის გენერალურმა დირექტორმა ნიკა გვარამიამ დღეს, 13 ივლისს გამართულ ბრიფინგზე მას მოუწოდა, რომ თუკი რუსთავი 2-ის საქმე დაეწერებოდა, აეცილებინა.
“ნუ განიხილავთ ამ საქმეს, თუ დაგეწერათ, და აიცილეთ. ჩვენ თქვენ არ გენდობით,”- განაცხადა ნიკა გვარამიამ.
2012 წელს მზია თოდუას “ქართული ოცნებისთვის” 14 ათასი ლარი აქვს შეწირული, 2014 წელს კი – 20 ათასი ლარი.
მზია თოდუა უზენაესი სასამართლოს მოსამართლედ პრეზიდენტის წარდგინებით პარლამენტმა 2015 წელს დანიშნა.
უზენაეს სასამართლოში დანიშვნამდე მისი საქმიანობა დაკავშირებული იყო ბიძინა ივანიშვილის “ქართუს” საქმიანობასთან:
2012-2015 წლებში იგი იყო ,,ბანკი ქართუს“ იურიდიული დეპარტამენტის დირექტორი;
2007-2012 წლებში – ,,ბანკი ქართუს“ სამეთვალყურეო საბჭოს წევრი;
2006 -2012 წლებში – ,,ქართუ ჯგუფის“ იურიდიული განყოფილების უფროსის მოადგილე; სამართლებრივი და მატერიალური უზრუნველყოფის სამსახურის იურიდიული განყოფილების უფროსი.