ახალი ამბები

გვეძლევა შესაძლებლობა, გავხდეთ უსაფრთხოების მიმწოდებელი ქვეყანა – ხიდაშელი სამიტს აჯამებს

10 ივლისი, 2016 • 1257
გვეძლევა შესაძლებლობა, გავხდეთ უსაფრთხოების მიმწოდებელი ქვეყანა – ხიდაშელი სამიტს აჯამებს

საქართველოს თავდაცვის მინისტრმა ვარშავაში, NATO-ს სამიტის დასასრულს ჟურნალისტებთან საუბრისას შეაჯამა სამიტის შედეგები, ასევე, სამიტის კომუნიკე, რომელიც 9 ივლისს გამოქვეყნდა.

NATO-ს სამიტი ვარშავაში 8-9 ივლისს გაიმართა. სამიტის ფარგლებში გაიმართა NATO-საქართველოს კომისიის სხდომა, სადაც ერთობლივი განცხადება მიიღეს. თინა ხიდაშელმა მონაწილეობა მიიღო ურთიერთთავსებადობის ფორმატში ნატოს წევრი და პარტნიორი ქვეყნების თავდაცვის მინისტრების შეხვედრასა და იმ სხვადასხვა შეხვედრაში, რომელიც ვარშავის სამიტის ფარგლებში გაიმართა.

ხიდაშელმა ასევე განაცხადა, რომ მიმდინარეობს მოლაპარაკება იმასთან დაკავშრებით, რომ ნატო-საქართველოს წვრთნისა და შეფასების ერთობლივ ცენტრში (JTEC), რომელიც საქართველოში გასულ წელს გაიხსნა, მომზადდნენ გაეროს სამშვიდობო ძალები.

“დღეს უკვე დეკლარაციაში მოხვდა ზუსტად ის ტექსტი, რომელზეც ჩვენ ერთი წლის განმავლობაში ვიბრძოდით, რომელიც ამბობს, რომ JTEC იქნება ნაწილი, იქნება აფილირებული ნატოს სისტემასთან. ანუ ჩვენ JTEC-ს გამოვიყენებთ უკვე როგორც არა მხოლოდ ჩვენი საკუთარი მიზნებისთვის, არამედ როგორც ნებისმიერი წევრი თუ პარტნიორი ქვეყნის მიზნებისთვის, როგორც ავღანეთში, ავღანეთის შეიარაღებული ძალების მოსამზადებლად, ასევე სხვა ოპერაციებისთვის. მათ შორის ერთ-ერთ ვერსიად ჩვენ უკვე ვიხილავთ გაეროს სამშვიდობო ოპერაციებისთვის სხვა ქვეყნების შეიარაღებული ძალების მომზადებას საქართველოში. ეს არის თვისობრივად ახალი დონე – რას ნიშნავს ეს? ეს ნიშნავს იმას, რომ საქართველო გადადის განვითარების სრულიად სხვა საფეხურზე, როდესაც ჩვენ გვეძლევა შესაძლებლობა, გავხდეთ უსაფრთხოების არა მხოლოდ მიმღები, არამედ, მიმწოდებელი ქვეყანა,”- განაცხადა ხიდაშელმა.

გარდა ამისა, ხიდაშელმა ისაუბრა ვარშავის სამიტის კომუნიკეში საქართველოსთან დაკავშირებით გაკეთებულ ჩანაწერებზეც:

“ერთი მნიშვნელოვანი მომენტი, რაზეც თავიდანვე ყურადღება უნდა გავამახვილო და რაც არის ამ კომუნიკეს სიახლე ყველა წინა დოკუმენტებთან შედარებით, რომელშიც საქართველო ყოფილა მოხსენიებული, ის არის, რომ გარდა იმ ნაწილებისა, რომელიც უშუალოდ ეხება საქართველოს, სადაც საუბარია საქართველოს პროგრესზე, წარმატებაზე, ნატოსთან თავსებადობაზე, ავღანეთის მისიაში ქართველი სამხედროებისთვის და ქართველი ხალხისათვის მადლობის გადახდაზე კონტრიბუციისთვის, საქართველო, როგორც გამჭოლი, გასდევს მთელ ტექსტს. მთელი ტექსტის განმავლობაში თქვენ სხვადასხვა ადგილებში შეხვდებით საქართველოს ზუსტად ისე, როგორც საფრანგეთს, იტალიას, გერმანიას, დიდ ბრიტანეთს, აშშ-ს, ანუ ნატოს წევრ ქვეყნებს. ეს პირველად მოხდა და ჩემი აზრით, ძალიან მნიშვნელოვანია, როდესაც ნატო საკუთარ თავზე, საკუთარ საქმიანობაზე, საკუთარ მიღწევებზე ან საფრთხეებზე, რომელსაც ის ხედავს, საუბრის დროს ყველგან თანაბრად, ზუსტად ისე, როგორც ნატოს წევრ ქვეყნებს, იხსენიებს საქართველოს. ეს არის პირველი მნიშვნელოვანი სხვაობა ამ ტექსტის და მნიშვნელოვანი დასტური საქართველოს მიმართ დამოკიდებულების.

საქართველოსთან მიმართებაში საუბარია ე.წ. „სამი ზღვის უსაფრთხოების“ პარაგრაფებში, სადაც ნატო საუბრობს ბალტიის, ხმელთაშუა ზღვის და შავი ზღვის უსაფრთხოების შესახებ – ამ სეგმენტში საქართველო სრულფასოვანი მონაწილეა. კომუნიკეთი გამეორებულია და დადასტურებულია ის, რაც გუშინ ნატო-საქართველოს კომისიის ერთობლივ სხდომაზე უკვე ითქვა, რომ საქართველო იქნება თანამონაწილე ამ უსაფრთხოების სისტემის. ეს არის პირველი და ყველაზე მთავარი მიღწევა.

საუბარი არის ჰაერსაწინააღმდეგო მიმართულებაზე, სადაც ასევე საუბარია, რომ დაგვეხმარება ყველა შესაძლო საშუალებით საქართველოს თავდაცვისუნარიანობის გაძლიერების კუთხით, ეს ერთ-ერთი მიმართულებაა – ჰაერსაწინააღმდეგო მიმართულების გაძლიერება იყოს პროგრესირებადი და ნატოს სტანდარტების ადეკვატური.

ურთიერთთავსებადობის შესახებ თავდაცვის მინისტერიალზე ზუსტად იმაზე იყო საუბარი, თუ როგორ მოამზადოს ნატომ თავისი პარტნიორები, რომ ისინი წევრობამდე უკვე იყვნენ თანაბარი ზომის, თანაბარი ძალის მატარებელნი და თანაბარი დოზით თანამონაწილეები ნებისმიერი მისიის, ნებისმიერ მომენტში, ნებისმიერი საფრთხის გამკლავების შემთხვევაში, როგორც კი საჭიროება ამას მოითხოვს. ზუსტად ამაზეა საუბარი კომუნიკეში ჰაერსაწინააღმდეგო თავდაცვის განვითარების ნაწილში – საქართველო იქნება სრულფასოვანი თანამონაწილე ნატოს სისტემის, ზუსტად აქ, ამ სეგმენტში, ამ მიმართულების განვითარებისთვის.

მესამე, რა თქმა უნდა, ვიცი, რომ თქვენ ეს ნაწილი გაინტერესებთ დემოკრატიასთან დაკავშირებით. სრული პასუხისმგებლობით გეუბნებით, ტექსტი საჯაროა და შეგიძლიათ ნახოთ. ჩვენ იქ პრაქტიკულად არ გვხვდება არაფერი განსაკუთრებული, გარდა ერთი წინადადებისა – ნატო დარწმუნებულია, რომ საქართველოში ჩატარდება დემოკრატიული არჩევნები ოქტომბერში. ეს არის, როგორც ერთგვარი დამაიმედებელი ფრაზა, რომელიც ჩვენ მოვისმინეთ ვარშავის სამიტისგან, რომ მათ ეჭვი არ ეპარებათ და დარწმუნებულები არიან, რომ არჩევნები იქნება დემოკრატიული. ბევრი პარაგრაფი, რომელიც ამ დოკუმენტშია, ეხება იმას, როგორ გააძლიერონ ჩვენი ქვეყანა, როგორ გაძლიერდეს ჩვენი თავდაცვისუნარიანობა,”- გნაცხადა ხიდაშელმა ჟურნალისტებთან საუბრისას.

მასალების გადაბეჭდვის წესი