ცესკომ ამომრჩეველთა აქტივობა 17:00 სთ-ის მდგომარეობით წარადგინა. გლდანში აღნიშნული დროისთვის ამომრჩეველთა 11,2 % მივიდა, გარდაბანში – 26,3%, კასპში – 40,3%, წყალტუბოში – 50,4%, ოზურგეთში – 49,3%, ხობში – 44,7% და ზუგდიდში – 54,1%. საარჩევნო უბნებზე კენჭისყრის პროცესი მშვიდ გარემოში მიმდინარეობს. შეგახსენებთ, რომ იმ ადგილობრივ მაჟორიტარულ ოლქებში, სადაც ტარდება არჩევნები, ამომრჩეველთა საერთო რაოდენობა 54, 314-ს შეადგენს.

“მოცემული დროისთვის საოლქო საარჩევნო კომისიებში შესულია 10 საჩივარი, ხოლო საარჩევნო უბნებზე – 8. აღსანიშნავია, რომ საოლქო საარჩევნო კომისიებსა და საუბნო საარჩევნო კომისიებში ზოგიერთი საჩივარი ანალოგიურია, ვინაიდან უფლებამოსილ პირებს, კანონმდებლობის მიხედვით, კენჭისყრის დღის პროცედურებთან დაკავშირებული საჩივრების წარდგენა ორივე დონის საარჩევნო კომისიებში შეუძლიათ,” – განაცხადა ცესკოს პრესსპიკერმა ანა მიქელაძემ.

დღეს საკრებულოს შუალედური არჩევნები გლდანის, გარდაბნის, კასპის, წყალტუბოს, ოზურგეთის, ხობის და ზუგდიდის ადგილობრივი მაჟორიტარული ოლქების 45 საარჩევნო უბანზე ტარდება.