18 ივლისს ევროპარლამენტში გაიმართება დებატები საქართველოში მედიის თავისუფლების, კერძოდ, „ნეტგაზეთისა“ და „ბათუმელების“ დირექტორის, მზია ამაღლობელის საქმის შესახებ, 19 ივნისს დაგეგმილია რეზოლუციის მიღება.

რეზოლუციის ერთობლივი პროექტის მიხედვით, ევროპარლამენტი გმობს მზია ამაღლობელის პოლიტიკური მოტივით გამოწვეულ დაპატიმრებასა და დევნას, მოითხოვს მის დაუყოვნებელ და უპირობო გათავისუფლებას და ყველა ბრალდების მოხსნას.

ევროპარლამენტის რეზოლუციის პროექტში ნათქვამია, რომ მზია ამაღლობელი „ისჯება კორუფციის გამოაშკარავებისა და 2024 წლის არჩევნების დროს არჩევნების გაყალბების შესახებ ინფორმაციის გავრცელებისთვის“ და ხელისუფლებამ წინასწარი პატიმრობის მკაფიო სამართლებრივი საფუძვლის გარეშე დააკავა. ევროპარლამენტარების შეფასებით, საქართველოს ხელისუფლებამ თითქმის გაანადგურა ქვეყანაში დარჩენილი დამოუკიდებელი მედიასაშუალებები მაშინ, როდესაც საჯარო საინფორმაციო სივრცე სრულად დომინირებულია რუსული სტილის პროპაგანდის და ანტიევროპული დეზინფორმაციის გამავრცელებელი პროსამთავრობო მედიის მიერ.

რეზოლუციის პროექტის მიხედვით, ევროპარლამენტი:

• მკაცრად გმობს „ქართული ოცნების“ რეჟიმის სისტემურ თავდასხმას დემოკრატიულ ინსტიტუტებზე, პოლიტიკურ ოპოზიციაზე, დამოუკიდებელ მედიაზე, სამოქალაქო საზოგადოებაზე და სასამართლოს დამოუკიდებლობაზე;
• ღრმა შეშფოთებას გამოთქვამს საქართველოში ჟურნალისტების თვითნებური დაკავებების, ძალადობისა და შევიწროების გამო, მათ შორის, ცილისწამების კამპანიების, სამართლებრივი დევნის, გენდერული ძალადობის შემთხვევების გამო; მოუწოდებს ხელისუფლებას, დაუყოვნებლივ შეწყვიტოს დაშინება და უზრუნველყოს ჟურნალისტების უსაფრთხოება და თავისუფლება; ჩატარდეს დამოუკიდებელი გამოძიება;
• მოუწოდებს საქართველოს ხელისუფლებას, დაუყოვნებლივ გაათავისუფლოს ყველა პოლიტიკური პატიმარი და სხვა უკანონოდ დაკავებული პირები, როგორიცაა აქტივისტი მათე დევიძე, ოპოზიციის ლიდერები: ზურაბ ჯაფარიძე, ნიკა მელია, ნიკა გვარამია და საქართველოს ყოფილი პრეზიდენტი მიხეილ სააკაშვილი; გმობს „ნაციონალური მოძრაობის“ თავმჯდომარის, თინა ბოკუჩავას მეუღლის ძალადობრივ გატაცებას და ინფორმაციას მისი შვილების უსაფრთხოებაზე მუქარის შესახებ;
• მოითხოვს ყველა რეპრესიული კანონმდებლობის დაუყოვნებლივ გაუქმებას, დემოკრატიის აღდგენას და მედიის თავისუფლებისა და სამოქალაქო თავისუფლებების სრულ დაცვას;
• მოუწოდებს ევროკავშირს, უცხოური აგენტების კანონის ამოქმედების შემდეგ გააძლიეროს მხარდაჭერა საქართველოს დამოუკიდებელი მედიისა და სამოქალაქო საზოგადოებისადმი და აკონტროლოს მიმდინარე სასამართლო პროცესები;
• გამოხატავს სინანულს საბჭოს, წევრი სახელმწიფოებისა და კომისიის მუდმივი უმოქმედობის გამო და კიდევ ერთხელ მოუწოდებს წევრ სახელმწიფოებს, დაუწესონ ორმხრივი სანქციები „ქართული ოცნების“ იმ ლიდერებსა და ოფიციალურ პირებს, რომლებიც დემოკრატიულ უკუსვლაზე არიან პასუხისმგებელნი;

ევროპარლამენტის პოლიტიკურ ჯგუფებს შორის შეჯერებულ რეზოლუციის პროექტში მცირედი შესწორებები შესაძლებელია, კენჭისყრაზე შევიდეს.