ისრაელის მთავრობამ ოფიციალურად გამოაცხადა საომარი მდგომარეობა.
საომარი მდგომარეობის გამოცხადება ისრაელის ძირითადი კანონის მე-40 მუხლის შესაბამისად მოხდა და ეს გადაწყვეტილება ოფიციალურად იძლევა „მნიშვნელოვანი სამხედრო ნაბიჯების გადადგმის უფლებას“.
”ომი, რომელიც აიძულეს ისრაელის სახელმწიფოს მკვლელი ტერორისტული თავდასხმის შედეგად ღაზას სექტორიდან, გუშინ, 06:00 საათზე დაიწყო”, — ნათქვამია ისრაელის პრემიერ-მინისტრ ბენიამინ ნეთანიაჰუს ოფისის მიერ გავრცელებულ განცხადებაში.
პრემიერ-მინისტრმა ბენიამინ ნეთანიაჰუმ ჯერ კიდევ შაბათს თქვა, რომ ქვეყანა ომში იყო, მაგრამ ეს განცხადება რიტორიკული იყო. ისრაელის მთავრობის დღევანდელი გადაწყვეტილება კი არის საომარი მდგომარეობის ოფიციალურად გამოცხადება.
7 ოქტომბრის დილით ისლამისტური ტერორისტული დაჯგუფება „ჰამასის“ მებრძოლებმა ისრაელზე მასშტაბური შეტევა დაიწყეს – ქალაქებს დაუშინეს რაკეტები, ისრაელის ტერიტორიაზეც შეიჭრნენ. მათ დახოცეს როგორც მშვიდობიანი მოქალაქეები, ისე — სამხედროები, მძევლად აიყვანეს მოხუცები, ქალები და ბავშვებიც, ფაქტების ამსახველი ვიდეოები კი სოციალური ქსელებით გაავრცელეს.
ისრაელმა საპასუხო სარაკეტო დარტყმები განახორციელა ღაზას სექტორზე, შედეგად 370 პალესტინელი დაიღუპა, 2200-მდე კი დაშავდა.
მედიის ცნობით, სულ მცირე 600 ადამიანი დაიღუპა ისრაელის მხარეს, ღაზას სექტორიდან მოულოდნელი თავდასხმის შედეგად.
ახლა მთავარი კითხვა მდგომარეობს, დაიწყებს თუ არა ისრაელი ღაზას სექტორში სახმელეთო ოპერაციასაც.
