რუსეთიდან საქართველოში შემოსული ინვესტიციების მოცულობა 2023 წლის იანვარ-ივნისში 7-ჯერ გაიზარდა. ინფორმაციას “საერთაშორისო გამჭვირვალობა — საქართველო”(TI) ავრცელებს.
ორგანიზაციამ ხსენებული მონაცემი გასული წლის ამავე პერიოდის მონაცემს შეადარა. TI-ის თანახმად, 2023 წლის იანვარ-ივნისში რუსეთიდან პირდაპირი ინვესტიციის სახით $56 მილიონი შემოვიდა.
“56 მლნ დოლარის ინვესტიციიდან 27 მლნ დოლარი საფინანსო და სადაზღვევო საქმიანობის სფეროში მიემართა, 18 მლნ დოლარი – უძრავი ქონების სფეროში, 7 მლნ დოლარი- საინფორმაციო ტექნოლოგიებში და 4 მლნ დოლარი- ვაჭრობაში”, — აღნიშნავს ორგანიზაცია და იქვე ამატებს:
“2017-2021 წლებში რუსული ინვესტიციების წილი საქართველოს მიერ მოზიდულ ჯამურ პირდაპირ უცხოურ ინვესტიციებში 5% იყო. თუმცა საქართველოში უცხოური ინვესტიციების დაახლოებით 38% ოფშორებიდან შემოდის და გარკვეულ შემთხვევებში, რუსული წარმომავლობის ფულთანაც არის დაკავშირებული”.
“საერთაშორისო გამჭვირვალობა — საქართველოს” მონაცემებით, შარშან, 2022 წელს, რუსეთიდან საქართველოში 108 მლნ დოლარის პირდაპირი უცხოური ინვესტიცია შემოვიდა, რაც რეკორდული წლიური მაჩვენებელია.