მაშველებმა გურიაში, სტიქიის ზონაში მესამე დაკარგულის ცხედარი იპოვეს. ის არასრულწლოვანია.  8 სექტემბერში სტიქიამ გურიის რეგიონში სამი ადამიანი იმსხვერპლა, მათ შორის ორი ბავშვია. 

“სტიქიის ზონიდან უსაფრთხო ადგილზე გადაყვანილია 50-მდე მოქალაქე. ნაპოვნია სამი ცხედარი, მათ შორის ორი მოზარდის”, – წერია  შინაგან საქმეთა სამინისტროს 8 სექტემბერს , საღამოს გავრცელებულ ინფორმაციაში. 

სამინისტროს ცნობით, სტიქიის ზონაში რჩება შინაგან საქმეთა სამინისტროს საგანგებო სიტუაციების მართვის სამსახურის უფროსი თემურ მღებრიშვილი, რომელიც საგანგებო შტაბს უწევს კოორდინაციას:

“გურიის რეგიონში, შინაგან საქმეთა სამინისტროს შესაბამისი დანაყოფებიდან მობილიზებულია როგორც ცოცხალი ძალა, ასევე მძიმე ტექნიკა, მცურავი საშუალებები და კინოლოგთა ჯგუფი. სტიქიის ზონაში მონიტორინგი სპეციალური დრონებით მიმდინარეობს”. 

8 სექტემბერს მეწყერი ჩამოწვა გურიის რეგიონში, ჩოჩხათის თემის რამდენიმე სოფელში.  მეწყერის და წყალდიდობის დროს დაიღუპა სამი, დანგრეულია, სულ მცირე, 10 სახლი.