საქართველოს სახელმწიფო უსაფრთხოების სამსახურის ინფორმაციით, ქვეყნის ტერიტორიაზე დაკავებულია ერთი პირი, რომელიც ტერორისტულ ორგანიზაციასთან, “ისლამური სახელმწიფოსთან” არის დაკავშირებული. აღნიშნულის შესახებ უწყებაში 6 მაისს გამართულ ბრიფინგზე ისაუბრეს.
უწყების თანახმად, სუს-ისა და ეროვნულ კონტრტერორისტულ სისტემაში ჩართული უწყებების ოპერაციის შედეგად, გამოვლენილია ხსენებული ტერორისტული ორგანიზაციის აქტივობები “სხვადასხვა უცხო ქვეყნის ტერიტორიაზე”.
სუს-ის კონტრტერორისტული ცენტრის დირექტორის მოვალეობის შემსრულებლის, ბაჩა მგელაძის განცხადებით, დაკავებულია უცხო ქვეყნის მოქალაქე, თუმცა არ აკონკრეტებს — რომლის. ამ ფაქტს სუს-ში გამოძიების ინტერესებით ხსნიან.
“ჩვენს მიერ მოპოვებულია ელექტრონული ინფორმაციის მატარებელი მოწყობილობა, საიდანაც ამოღებულია აშშ-ისა და ევროპის დედაქალაქების სტრატეგიული ობიექტების სატელიტური ფოტოები.
მასშტაბური კონტრტერორისტული ღონისძიებების ფარგლებში, იდენტიფიცირებულია ტერორისტულ ორგანიზაციასთან შემხებლობაში მყოფი პირები, კომუნიკაციის ფორმები, მეთოდები, დაინტერესების სფეროები და შესაძლო თავდასხმის ობიექტები საქართველოს ფარგლებს გარეთ”, — თქვა მგელაძემ.
მისივე სიტყვებით, “საერთაშორისო ტერორისტული რისკებიდან გამომდინარე”, სუს-მა სისხლის სამართლის გამოძიების ფარგლებში მოპოვებული ინფორმაციები ოპერატიულად გაუზიარა საქართველოს საერთაშორისო პარტნიორებსა და მეზობელ ქვეყნებს, მათ შორის, თურქეთს.
“ამასთან, სამსახურში ამ ეტაპზე აქტიურად მიმდინარეობს ოპერატიულ-სამძებრო, საგამოძიებო და ფარული საგამოძიებო მოქმედებები”, — აღნიშნავენ სახელმწიფო უსაფრთხოების სამსახურში.