საქართველოს პრემიერ-მინისტრი, ირაკლი ღარიბაშვილი ამბობს, რომ სახელმწიფო ჯერ არც შემოიტანს და არც დააფინანსებს აქონდროპლაზიის წამალს.
ღარიბაშვილმა დღეს მთავრობის სხდომაზე განაცხადა, რომ წამლის დაფინანსების პრობლემა ქვეყანაში არ დგას, რადგან საუბარია დაახლოებით 10 მილიონზე. თუმცა მთავრობა ამ ნაბიჯს ჯერ არ გადადგამს, რადგან მას დამატებითი სამედიცინო მტკიცებულებები სჭირდება.
საუბარია პრეპარატ Voxzogo-ზე (აქტიური ნივთიერება – ვიზოდორიტით), რომელსაც 2021 წელს აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA) ავტორიზაცია მისცა. ეს პრეპარატი პირველია, რომელიც გამოიყენება სინდრომისა და მისგან გამოწვეული სიმპტომების სამკურნალოდ. მშობლები ამბობენ, რომ მისი მიღება ეფექტურია მხოლოდ გარკვეულ დრომდე, კერძოდ – 18 წლამდე.
„სამწუხაროდ, ბოლო დღეებში ვუყურებთ რა ვნებათაღელვას, რომელიც შექმნილია აქონდროპლაზიის დაავადების მქონე ბავშვების საკითხთან დაკავშირებით, იმის მიუხედავად, რომ ჯანდაცვის მინისტრმა, მისმა მოადგილემ, ძალიან ავტორიტეტულმა ექიმებმა, ჯანდაცვის მსოფლიო ორგანიზაციის წარმომადგენელმა – ყველამ გააკეთეს, ვფიქრობ, ამომწურავი კომენტარი. მათ განმარტება მისცეს ამ იშვიათი გენეტიკური დაავადების მქონე ბავშვების ოჯახებს, მშობლებს – ბატონი მინისტრი შეხვდა თავად, მისი მოადგილეც – არაერთი საუბარი შედგა მათთან, საჯაროდაც გაკეთდა არაერთხელ ვრცელი კომენტარი, თუმცა ჯერ კიდევ რჩება კითხვები და, სამწუხაროდ, თქვენ ნახეთ, რომ ხდება გაუგონარი რამ – უპასუხისმგებლო პოლიტიკოსები, რომლებიც გამოირჩევიან სიყალბითა და ფარისევლობით, აქაც ცდილობენ უმწიკვლო, უმწეო ბავშვები დაიყენონ წინ და აწარმოონ პოლიტიკური კამპანია.
აქონდროპლაზიის დაავადების მქონე ბავშვების მიმართ მინდა გამოვხატო სრული თანაგრძნობა, მინდა მათ ვუთხრა, რომ სახელმწიფო მათ გვერდით დგას და, რა თქმა უნდა, ჩვენ გავაკეთებთ ყველაფერს, რაც საჭიროა, მაგრამ მინდა ვთხოვო, რომ ნუ გამოაყენებინებენ თავს და ნუ მიიღებენ ამ პოლიტიკურ კამპანიაში მონაწილეობას ნებსით თუ უნებლიეთ“, – ამბობს ღარიბაშვილი.
ღარიბაშვილის თქმითვე, სახელმწიფო უარს არ ეუბნება მშობლებს წამლის დაფინანსებაზე და არგუმენტად ასევე მოჰყავს მისი ნაცნობები.
„წარმოაჩინეს საკითხი ისე: მიეცით წამალი ბავშვებს, თითქოს წამალი რომ მივცეთ… ჩვენ, მთავრობამ რომ მივცეთ, ყველაფერი შეიცვლება. ასევე იმასაც კადრულობენ, თითქოს მათ სიცოცხლეს ემუქრება საფრთხე, რაც ძალიან დიდი ტყუილია, იცით თქვენ ბევრი ჩვენ გარშემო, მეც რამდენიმე საერთო ნაცნობი მყავს, რომლის შვილიც ამ დიაგნოზით არის და მათ სიცოცხლეს საფრთხე არ ემუქრება. ძალიან ბევრი ცნობილი ადამიანი ვიცი მთელ მსოფლიოში, რომელიც არის წარმატებული და მათი დისკრიმინაცია არ შეიძლება, ჩვენ უნდა ვიყოთ ამისკენ მოწოდებული.
რაც შეეხება ამ კონკრეტულ მედიკამენტს, სამწუხაროდ, მიწევს ვრცელი კომენტარის გაკეთება იმიტომ, რომ ვატყობ, მიუხედავად ამ კომპეტენტური, კვალიფიციური განმარტებებისა, არ არის საკმარისი და საჭიროებს პოლიტიკურ ახსნა-განმარტებას. თქვენ იცით, რომ ეს წამალი გამოიგონა ერთ-ერთმა ამერიკულმა კომპანიამ. თვითონ ის ქვეყანა, სადაც გამოიგონეს ეს მედიკამენტი, ჯერ არ აფინანსებს ამ პროგრამას. გესმით ხომ, რა მარტივად არის საქმე, ჯერ კიდევ ელოდებიან მეოთხე ფაზის დასრულებას, კვლევას, გვერდითი ეფექტების გამოვლენას და ამის შემდეგ იმედი გვაქვს, რომ ძალიან მალე გადაწყდება ეს საკითხი.“
ღარიბაშვილმა დღეს გაიმეორა ჯანდაცვის სამინისტროს არგუმენტები და თქვა, რომ ბევრ ქვეყანაში პრეპარატი სახელმწიფო ბიუჯეტიდან არ ფინანსდება. ამასთანავე, ღარიბაშვილი დასძენს, რომ არც ჯანმრთელობის მსოფლიო ორგანიზაციას გაუცია რეკომენდაცია ამ მედიკამენტის დასაფინანსებლად.
„მაგრამ ამ ყველაფრის მიუხედავად, ვნახეთ, რომ დეზინფორმაცია გავრცელდა. ჩვენ უარს არ გეუბნებით.. თანხაზე საუბარი შეიძლება იყოს 10 მილიონზე დაახლოებით, და ეს თანხა ჩვენთვის არ არის კრიტიკული, მაგრამ ღმერთმა დაიფაროს… თუ ამ წამლის მიცემით შეიძლება ისე გართულდეს ამ ბავშვების ჯანმრთელობის მდგომარეობა, რომ უფრო ცუდად წავიდეს მათი ჯანმრთელობა, რა თქმა უნდა, ამ შემთხვევაში პასუხისმგებლობა ჩვენი ანუ სახელმწიფოსი, მთავრობის იქნება, რაც, რა თქმა უნდა, არ გვინდა ჩვენ, რომ მოხდეს. ამიტომ საჭიროა ცოტა მოცდა, დრო გვჭირდება, ჩვენ ერთად ვიმუშაოთ. მინდა მივმართო ამ ბავშვების მშობლებს, სამინისტრო არის მზად, რომ ერთად გავიაროთ ეს პროცესი, დაველოდოთ მათ შორის ჯანდაცვის მსოფლიო ორგანიზაციის საბოლოო დასკვნებს, მათ მითითებებს და ამის შემდეგ მოხდება ამ პროგრამის ამოქმედება. 200 ქვეყანაში არცერთი სახელმწიფო პროგრამა არ აფინანსებს ამ მედიკამენტით მკურნალობას და ჩვენ გვეუბნებიან, ამ 200 ქვეყნიდან საქართველო იყოს გამონაკლისი და უპასუხისმგებლობით, პოპულისტურად ჩავერთოთ ამ პროგრამაში.
ჩვენ რომ ვიყოთ უპასუხისმგებლო პოპულისტები, ალბათ ამ 10 მილიონს გამოვყოფდით და დავიწყებდით დაფინანსებას“, – ამბობს პრემიერ-მინისტრი და ამატებს, რომ საქართველო სამართლებრივი სახელმწიფოა და ეყრდნობა წესებს.
„ყველაფერი იქნება ძალიან კარგად, ჩვენ დაველოდებით რამდენიმე თვე, მუდმივად გვექნება ინფორმაცია, გვაქვს კონტაქტი ასევე ამ წამლის მწარმოებელ კომპანიასთან, ჯანმოსთან, ევროპის ქვეყნებთან, აშშ-თან და როგორც კი გადაწყდება აღნიშნული საკითხი, როგორც კი რამდენიმე ქვეყანა დაიწყებს ამ, ასე ვთქვათ, გაიდლაინებით მკურნალობას – ჩვენც ჩავერთვებით ამ პროგრამაში. ეს არის ჩვენი პოზიცია”.
უკვე რამდენიმე თვეა, რაც მშობლები აქტიური საპროტესტო აქციებით ითხოვენ აქონდროპლაზიის მქონე ბავშვებისთვის აუცილებელ პრეპარატს. სახელმწიფო ამ მოთხოვნას ჯერჯერობით არ აკმაყოფილებს. მშობლები თითქმის 1 კვირაა, რაც მთავრობის შენობასთან ათენებენ.
ამ თემაზე წაიკითხეთ:
