რიკოთის უღელტეხილზე ავტობანის მშენებლობაზე დასაქმებული სატვირთო ავტომობილების მძღოლები გაიფიცნენ. დასაქმებულები შრომითი პირობების გაუმჯობესებას და ადეკვატურ ანაზღაურებას ითხოვენ.
„ორი დღეა გაფიცულები ვართ. ვითხოვთ 8-საათიან სამუშაო გრაფიკს და დღეში შრომის ანაზღაურებას 50 ლარს. ახლა ვმუშაობთ 9 საათს და გვაქვს 33 ლარი“, – უთხრა „ნეტგაზეთს“ რამაზ ტაბატაძემ, ის რიკოთის უღელტეხილზე, ხევი-ჩუმათელეთის მონაკვეთზე, სატვირთო მანქანაზე მუშაობს.
ხევი-ჩუმათელეთი ერთ-ერთი ყველაზე რთული მონაკვეთია. აქ განვითარებული მეწყრული პროცესების და ქვათაცვენის გამო რამდენიმე დღე იყო აკრძალული რიკოთის უღელტეხილზე საავტომობილო მიმოსვლა.
ტელეკომპანია „მთავარ არხთან“ პირდაპირ ეთერში ერთ-ერთი სატვირთოს მძღოლი ყვება, რომ დაცული არაა შრომის უსაფრთხოების ნორმები. კერძოდ, მძღოლის თქმით, „12-ტონიანი მანქანით 50-60 ტონა ტვირთი“ დააქვთ.
გაფიცული მძღოლები ამბობენ, რომ მუშაობას მანამ არ განაახლებენ, სანამ კომპანია მათ მოთხოვნებს არ დააკმაყოფილებს.
გაფიცული მძღოლები ჩინეთის სამშენებლო კორპორაციაში არიან დასაქმებული. ეს კომპანია რიკოთზე ხევი-ჩუმათელეთის მონაკვეთს აშენებს.
ნეტგაზეთი დაუკავშირდა საქართველოს საავტომობილო გზების დეპარტამენტს. დეპარტამენტის ცნობით, მშენებელი კომპანია წერილობით განცხადებას ამზადებს, სადაც მათი პოზიცია იქნება წარმოდგენილი.
ამავე თემაზე:
მთავარი ფოტო: გაფიცული სატვირთოს მძღოლები. ფოტოს ავტორი: ირაკლი ვაჩიბერაძე